અમીરીનું શિખર કે એકલતાનો અભિશાપ?

વીક એન્ડ

ફોકસ -વૈભવ જોશી

કહેવાય છે કે સફળતાની ટોચ પર પહોંચવામાં આનંદ ઘણો હોય છે, પણ ત્યાં જગ્યા એટલી સાંકડી હોય છે કે માણસ મોટે ભાગે ત્યાં એકલો જ રહી શકે છે. ખૂબ માર્મિક વાત છે આ. કહેવાનો અર્થ એટલો જ કે માણસ જેટલો વધુ સફળ એટલો વધુ એકલવાયો બની જતો હોય છે. લોકો ઘણી વાર કહેતા હોય છે, રૂપિયા પાછળ ભાગ નહીં, એકલો પડી જઈશ. તેમ છતાં આખી દુનિયા રૂપિયા પાછળ ગાંડી થાય છે. એટલે જ આપણે ઘણી વાર જોઈએ છીએ કે જેમની પાસે ખૂબ સંપત્તિ હોય છે તેઓ એકલા પડી જાય છે. માત્ર ચાપલૂસી કરનારા અને સ્વાર્થી લોકો તેમની આસપાસ માખીઓની જેમ ફર્યા કરતા હોય છે.
આખરે આવું થાય છે શા માટે?
આનો જવાબ થોડાં ઉદાહરણોથી શોધવા પ્રયત્ન કરીએ. અમરિકાની સેન્ડી સ્ટેનનો દાખલો લઈએ. વર્ષો સુધી જાત જાતની નોકરીઓ કર્યા બાદ આખરે તેમને સફળતા મળી. ૫૩ વર્ષની ઉંમરે તેમણે મહિલાઓ માટે ખૂબ ઉપયોગી એવી, પર્સ સાથે લગાડાઈ શકે તેવી ‘ફાઇન્ડર્સ કી’ની શોધ કરી, જે મહિલાઓને પર્સમાંથી ચાવી શોધવાની ઝંઝટમાંથી મુક્તિ આપે. આ શોધને કારણે સેન્ડી રાતોરાત કરોડપતિ બની ગઈ. નવું ઘર, નવી ગાડી ખરીદી, પણ હજી તો સેન્ડી સફળતાનો આનંદ માણે તે પહેલાં તેના જીવનમાં સૂનકાર વ્યાપી ગયો. તેના પતિ સાથે છૂટાછેડા થઈ ગયા, કેમ કે પત્નીની સફળતાથી પતિને ઈર્ષા થવા માંડી. ઘણા મિત્રો પણ સેન્ડીથી દૂર થઈ ગયા. સેન્ડી કહે છે તમારી સફળતાથી લોકોને બળતરા થાય એ બહુ સામાન્ય વાત છે.
સફળતા સાથે એકલતા આવતી હોવા છતાં લોકો ધનનો મોહ તો છોડી નથી શકતા. હા, તેનાથી તકલીફ જરૂર થાય છે. બ્રિટિશ એક્સપર્ટ સ્ટીફન ગિલ્બર્ટ કહે છે કે સફળતા અને પ્રસિદ્ધિની માણસના જીવન પર ઊંડી અસર પડે છે. ઘણા માટે આ એક કડવો અનુભવ પણ હોઈ શકે છે. ધનવાન બનાવનાં, સફળ બનવાનાં સપનાં તો ઘણા જુએ છે, પણ તેની સાથે આવતી એકલતાને કેમ પહોંચી વળવું એ આવડતું નથી હોતું. ધનવાન બનતાં જ જ્યારે મિત્રો દૂર થવા માંડે અથવા નકલી મિત્રો તમને ઘેરી વળે, પરિવાર તમારા પૈસાને પોતાના સમજીને સલાહસૂચનો આપવા માંડે અથવા અધિકાર બતાવવા માંડે, ત્યારે તેની સાથે કેવી રીતે વ્યવહાર કરવો તે ખબર નથી હોતી. પૈસો આવતાં ઘણાનો વ્યવહાર બદલાઈ જાય છે. તેઓ રૂપિયા ઉડાવવા માંડે છે. પહેલાં જેમાં તેમની રુચિ હતી તેને બદલે બીજી વાતોમાં રુચિ લેવા માંડે છે. તેને કારણે તેમના જૂના સાથીઓ તેમનાથી દૂર થવા માંડે છે. તો બીજી બાજુ ચમચાગીરી કરનારા અને મતલબી લોકો નજીક આવીને તમારો ફાયદો ઉઠાવવાની કોશિશ કરવા માંડે છે.
જ્યારે આસપાસના લોકોનો વર્તાવ તમારી તરફ બદલાય એટલે સ્વાભાવિક રીતે તમે તેમના પર શંકા કરવાના. પરિવારના લોકોનો સ્નેહ, મિત્રોના અચાનક ઊમટી પડેલા પ્રેમનો મતલબ શોધવા માંડો છો. આવા સમયે ઘણા સફળ લોકો પોતાની આસપાસ જાણે એક કોશેટો રચી દે છે જેમાં કોઈ પ્રવેશી ન શકે એટલું જ નહીં ‘પોતાના જેવા’ સાથીની શોધ કરવા માંડે છે, જેઓ સફળ હોય, જેમની પાસે પૈસા હોય. પછી એવા લોકો વચ્ચે સાચા સાથીની શોધ કરે જે હજી હમણાંથી જ પ્રેમ પ્રદર્શિત કરતા હોય. આવા પ્રશ્ર્નોને હલ કરવા આસાન નથી હોતા.
હકીકતમાં અમીરી સાથે તમારી પ્રાથમિકતા બદલાઈ જાય છે. તમારે એવા લોકો સાથે ઘનિષ્ઠતા વધારવાની જરૂર પડે જે તમારું કામ આગળ વધારવામાં મદદ કરે. જૂના મિત્રો કે સાથીઓને સમય આપી શકાતો નથી.
જૂના મિત્રોને લાગે છે કે તેમની પાસે રૂપિયા આવી ગયા એટલે હવે ‘દોસ્ત દોસ્ત ના રહા!’ તેમના પ્રસંગો કે પાર્ટીમાં સમયને અભાવે ન પહોંચી શકો તો સંબંધોમાં પડેલી તિરાડ વધીને ખીણ બનવા માંડે છે. ‘આઉટ ઓફ સાઈટ ઇઝ આઉટ ઓફ માઈન્ડ’ને ન્યાયે સાથે સમય ન વિતાવી શકવાથી સંબંધોમાં અંતર આવી જાય. જોકે મોટી ઉંમરે અમીર બનેલાને આ સમસ્યાનો સામનો નથી કરવો પડતો, કેમ કે સામાન્ય માન્યતા એવી છે કે જેમ જેમ ઉંમર વધે તેમ તેમ તમારી કમાણી વધવી જોઈએ.
સેન્ડી સ્ટેને એકલતાને ખાળવા નવા મિત્રો બનાવી લીધા છે. પોતાની કંપનીમાં કામ કરતા લોકો સાથે તે વધુ સમય વિતાવે છે. તેનાથી કામમાં પણ સુધાર આવ્યો અને એકલતા પણ ઓછી થઈ. હાલમાં એ સહુને પોતાને ખર્ચે ઉત્તર ધ્રુવના પ્રવાસે લઈ ગયાં. સેન્ડી પોતાના સંઘર્ષના દિવસોના સાથીઓ સાથે પણ ફરી જોડાઈ રહ્યાં છે. કદાચ અમીરીની એકલતાને દૂર કરવાનો આ સૌથી સચોટ ઉપાય છે. ઉ

પ્રતિશાદ આપો

તમારું ઇમેઇલ સરનામું પ્રકાશિત કરવામાં આવશે નહીં.