ડૉલર નબળો પડતાં વૈશ્ર્વિક સોનામાં ઉછાળો છતાં રૂપિયો મજબૂત થતાં સ્થાનિક સોનામાં ₹ ૧૬નો મામૂલી સુધારો, ચાંદી ₹ ૪૩૩ વધી

(વાણિજ્ય પ્રતિનિધિ તરફથી)
મુંબઈ: આંતરરાષ્ટ્રીય વિનિમય બજારમાં આજે ડૉલર ઈન્ડેક્સ નબળો પડતાં લંડન ખાતે સોનાના હાજર અને વાયદાના ભાવમાં ૦.૬ ટકાનો અને ચાંદીમાં ૦.૯ ટકાનો ઉછાળો આવ્યો હતો. જોકે, આજે સ્થાનિક ફોરેક્સ માર્કેટમાં ડૉલર સામે રૂપિયો ૬૩ પૈસા ઉછળીને ૮૨ની અંદરની સપાટીએ ઉતરી જતા સ્થાનિકમાં સોનાની આયાત પડતરો ઘટવાને કારણે વિશ્ર્વ બજારની સરખામણીમાં સોનાના ભાવમાં ૧૦ ગ્રામદીઠ મામૂલી રૂ. ૧૫થી ૧૬નો સુધારો આવ્યો હતો. જોકે, ચાંદીમાં વૈશ્ર્વિક પ્રોત્સાહક અહેવાલે સ્ટોકિસ્ટોની લેવાલીને ટેકે ભાવ કિલોદીઠ રૂ. ૪૩૩ વધી આવ્યા હતા.
બજારનાં સાધનોના જણાવ્યાનુસાર આજે સ્થાનિક ઝવેરી બજારમાં ખાસ કરીને .૯૯૯ ટચ ચાંદીમાં સ્ટોકિસ્ટોની નીચા મથાળેથી સટ્ટાકીય લેવાલી ઉપરાંત ઔદ્યોગિક વપરાશકારો તથા જ્વેલરી ઉત્પાદકોની માગને ટેકે ભાવ કિલોદીઠ રૂ. ૪૩૩ ઉછળીને ફરી રૂ. ૬૪,૦૦૦ની સપાટી કુદાવીને રૂ. ૬૪,૧૩૯ના મથાળે રહ્યા હતા. વધુમાં આજે વૈશ્ર્વિક સોનામાં પ્રોત્સાહક વલણ છતાં સ્થાનિકમાં ડૉલર સામે રૂપિયાની મજબૂતી અને વધુ ભાવઘટાડાના આશાવાદ હેઠળ સ્ટોકિસ્ટો, રોકાણકારો અને જ્વેલરી ઉત્પાદકોની નિરસ માગ ઉપરાંત પ્રવર્તમાન હોળાષ્ટકને કારણે રિટેલ સ્તરની લેવાલી પણ અત્યંત પાંખી રહેતાં ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૧૫ વધીને રૂ. ૫૫,૮૭૮ અને ૯૯.૯ ટચ સ્ટાન્ડર્ડ સોનાના રૂ. ૧૬ વધીને રૂ. ૫૬,૧૦૩ના મથાળે રહ્યા હતા.
દરમિયાન આજે લંડન ખાતે સત્રના આરંભે ખાસ કરીને ડૉલર ઈન્ડેક્સમાં પીછેહઠ જોવા મળી હોવા ઉપરાંત થોડાઘણાં અંશે વેચાણો કપાવાથી હાજર અને વાયદામાં ભાવ ગઈકાલના બંધથી ૦.૬ ટકા વધીને અનુક્રમે ઔંસદીઠ ૧૮૪૭ ડૉલર અને ૧૮૫૨ ડૉલર આસપાસ ક્વૉટ થઈ રહ્યા હતા. જોકે, ફેડરલ રિઝર્વ વ્યાજદરમાં આક્રમક ધોરણે વધારો કરે તેવી ભીતિ સેવાઈ રહી હોવાથી રોકાણકારો સોનામાં નવી લેવાલીથી દૂર રહ્યા હોવાથી ભાવવધારો મર્યાદિત રહ્યો હતો. આ અહેવાલ લખાઈ રહ્યો છે ત્યારે સોનાના વૈશ્ર્વિક ભાવમાં સાપ્તાહિક ધોરણે બે ટકા જેટલો સુધારો આવ્યો હતો. આ ઉપરાંત આજે સત્રના આરંભે હાજરમાં ચાંદીના ભાવ ૦.૯ ટકા વધીને ઔંસદીઠ ૨૧.૦૮ ડૉલર આસપાસ ક્વૉટ થઈ રહ્યા હતા.
સૂત્રોના જણાવ્યાનુસાર આજે ડૉલર ઈન્ડેક્સમાં ૦.૨ ટકાનો ઘટાડો આવ્યો હતો. તેમ જ ગત જાન્યુઆરી પછી પહેલી વખત ડૉલરમાં સાપ્તાહિક ધોરણે ઘટાડો આવે તેવી શક્યતા વ્યક્ત થઈ
રહી છે.
અમેરિકી ફેડરલના વ્યાજવધારાની અર્થતંત્ર પર માઠી અસરો વર્તમાન વસંતઋતુ આસપાસથી શરૂ થઈ શકે છે અને અમેરિકી ફેડરલ રિઝર્વ વ્યાજદરમાં ૨૫ બેસિસ પૉઈન્ટનો વધારો કરવા માટે મક્કમ હોવાનું એટલાન્ટા ફેડનાં પ્રમુખ રાફેલ બોસ્ટિકે ગઈકાલે જણાવ્યું હતું. વધુમાં અમેરિકા ખાતે બેરોજગારી ભથ્થું મેળવવા માટે અરજી કરનારાઓની સંખ્યામાં ઘટાડો થવાથી ફેડરલ રિઝર્વ લાંબા સમયગાળા સુધી વ્યાજદર ઊંચી સપાટીએ રાખે તેવી શક્યતા પણ પ્રબળ બની હોવાનું વિશ્ર્લેષકો જણાવી રહ્યા છે.