સ્થાનિકમાં સોનું ₹ ૪૧૬ ઊછળ્યું, ચાંદી ₹ ૧૫૮૨ની તેજી સાથે ₹ ૭૧,૦૦૦ની પાર
(વાણિજ્ય પ્રતિનિધિ તરફથી)
મુંબઈ: આંતરરાષ્ટ્રીય સ્તરે બૅન્કિંગ ક્ષેત્રની કટોકટીને ધ્યાનમાં અમેરિકી ફેડરલ રિઝર્વનું વ્યાજદરમાં વધારો કરવાનું વલણ કૂણું પડે તેવી શક્યતાને ધ્યાનમાં લેતાં વૈશ્ર્વિક ગઈકાલે સોનામાં સલામતી માટેની માગને ટેકે ભાવમાં આગેકૂચ જળવાઈ રહી હતી. જોકે, આજે લંડન ખાતે સત્રના આરંભે ભાવમાં વધ્યા મથાળેથી ટકેલું વલણ રહ્યું હતું. સ્થાનિક ઝવેરી બજારમાં ગઈકાલની રામનવમીની જાહેર રજા બાદ આજે વૈશ્ર્વિક ઓવરનાઈટ પ્રોત્સાહક અહેવાલે સોનાના ભાવમાં ૧૦ ગ્રામદીઠ રૂ. ૪૧૫થી ૪૧૬નો ઉછાળો આવ્યો હતો. જોકે, આજે સ્થાનિક ફોરેક્સ માર્કેટમાં આ ડૉલર સામે રૂપિયામાં ૧૪ પૈસાનો સુધારો આવ્યો હોવાથી સ્થાનિકમાં સોનાની આયાત પડતરમાં ઘટાડો થવાથી વિશ્ર્વ બજારની સરખામણીમાં ભાવવધારો મર્યાદિત રહ્યો હતો. વધુમાં આજે ચાંદીના ભાવ કિલોદીઠ રૂ. ૧૫૮૨ની તેજી સાથે રૂ. ૭૧,૦૦૦ની સપાટી પાર કરી ગયા હતા. બજારનાં સાધનોના જણાવ્યાનુસાર આજે ખાસ કરીને .૯૯૯ ટચ ચાંદીમાં સ્ટોકિસ્ટોની સટ્ટાકીય લેવાલી ઉપરાંત ઔદ્યોગિક વપરાશકારો તથા જ્વેલરી ઉત્પાદકોની છૂટીછવાઈ માગને ટેકે ભાવ કિલોદીઠ રૂ. ૧૫૮૨ના ઉછાળા સાથે રૂ. ૭૧,૦૦૦ની સપાટી કુદાવીને રૂ. ૭૧,૫૮૨ના મથાળે રહ્યા હતા. જોકે, આજે સોનામાં ઊંચા મથાળેથી જ્વેલરી ઉત્પાદકો અને રિટેલ સ્તરની લેવાલી એકંદરે નિરસ રહી હતી, પરંતુ સ્ટોકિસ્ટો અને રોકાણકારોની છૂટીછવાઈ ખપપૂરતી માગને ટેકે ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૪૧૫ વધીને રૂ. ૫૯,૫૧૨ અને ૯૯.૯ ટચ સ્ટાન્ડર્ડ સોનાના રૂ. ૪૧૬ વધીને રૂ. ૫૯,૭૫૧ના મથાળે રહ્યા હતા.
પ્રવર્તમાન અમેરિકાની બૅન્કિંગ ક્ષેત્રની કટોકટીને ધ્યાનમાં લેતા અમેરિકી ફેડરલ રિઝર્વ તેની આગામી નીતિવિષયક બેઠકમાં વ્યાજદર વધારવા અંગે કૂણું વલણ અપનાવે તેવી શક્યતાને ધ્યાનમાં લેતાં ગઈકાલે ન્યૂ યોર્ક મર્કન્ટાઈલ એક્સચેન્જ ખાતે સોનામાં સલામતી માટેની માગને ટેકે ભાવમાં સુધારાતરફી વલણ રહ્યા બાદ આજે લંડન ખાતે સત્રના આરંભે હાજર અને વાયદામાં ભાવ અનુક્રમે ઔંસદીઠ ૧૯૮૦.૭૦ ડૉલર અને ૧૯૯૭.૧૦ ડૉલરની સપાટીએ ટકેલા ક્વૉટ થઈ રહ્યા હતા, જ્યારે ચાંદીના ભાવ ગઈકાલના બંધથી સાધારણ ૦.૧ ટકાના સુધારા સાથે ઔંસદીઠ ૨૩.૯૦ ડૉલર આસપાસ ક્વૉટ થઈ રહ્યા હતા.
સૂત્રોના જણાવ્યાનુસાર વર્તમાન માર્ચ મહિનાના અંતે અર્થાત્ આજે સોનામાં સતત બીજા ત્રિમાસિકગાળામાં સોનામાં ત્રિમાસિક ધોરણે ઉછાળો જોવા મળે તેવી શક્યતા છે. જોકે, અત્યાર સુધી સોનામાં ત્રિમાસિક ધોરણે ભાવમાં ૮.૬ ટકાની તેજી આવી છે, જ્યારે માસિક ધોરણે જુલાઈ ૨૦૨૦ પછીનો સૌથી મોટો આઠ ટકાનો સુધારો જોવા મળ્યો છે. હાલની પરિસ્થિતિ જોતા બૅન્કિંગ કટોકટી પૂરી નથી થઈ અને અમુક મુદ્દાઓ સપાટી પર નથી આવી રહ્યા આથી આગામી ટૂંકા સમયગાળામાં વૈશ્ર્વિક સોનાના ભાવ ઔંસદીઠ ૧૯૩૦થી ૨૦૦૦ ડૉલર આસપાસના મથાળે કોન્સોલિડેટ થાય તેવી શક્યતા વિશ્ર્લેષકો વ્યક્ત કરી રહ્યા છે.
