Homeઈન્ટરવલઅજબ ગજબની દુનિયા

અજબ ગજબની દુનિયા

હેન્રી શાસ્ત્રી

મરેલો માણસ ફરી મરી ગયો!
કેટલાક લોકો સદ્ગુણ – સત્કાર્યના જોરે મૃત્યુ પામવા છતાં જીવંત રહેતા હોય છે તો અવગુણ કે અવદશાને કારણે કેટલાક લોક જીવતે જીવ મરી જાય છે. ઉત્તર પ્રદેશના એક વડીલ તો સરકારી પેનના ગોટાળાને કારણે જીવતા હોવા છતાં મૃત્યુ ઘોષિત થયા હતા અને કરુણતા તો એ છે કે પોતે જીવતા છે એ સાબિત કરવાની મથામણમાં અંતે તેમનું મૃત્યુ થયું. વાત એમ બની કે ૨૦૧૬માં ૯૦ વર્ષના વડીલ શ્રી ફેરઈનું અવસાન થયું. અજ્ઞાનતામાં કે ઈરાદાપૂર્વક સરકારી દસ્તાવેજોમાં શ્રી ફેરઈને બદલે એમના નાના ભાઈ ખેલઈને મૃત જાહેર કરવામાં આવ્યો. વાત અહીં અટકી નહીં, પણ એવી વસિયત તૈયાર થઈ જેમાં જીવંત ખેલઈની બધી સંપત્તિ મોટાભાઈ ફેરઈનાં પત્ની અને બાળકોને નામ કરી દેવામાં આવી. નુક્તા કે ફેર સે ખુદા જુદા હો જાતા હૈ કે પછી દિન (દિવસ) દીન (ગરીબ) બની જાય એવો ઘાટ થયો. હકીકતની જાણ થતાં ખેલઈજી ઘાંઘા થઈ ગયા. પોતે જીવે છે એ સાબિત કરવા સરકારી ઓફિસમાં આંટાફેરા માર્યા પણ કોઈ એમની વાત કાને ધરવા તૈયાર નહોતું. કેટલીક કોશિશ પછી એક ઓફિસર ખેલઈજીનો કેસ સાંભળવા તૈયાર થયો, પણ અચાનક તેમની તબિયત લથડી અને કેફિયત માંડે એ પહેલા જ તેમનું અવસાન થયું. જીવંત હોવાના પુરાવા એકઠા કરતા કરતા જાતે જ મૃત્યુની સાબિતી બની ગયા. કેવી કરુણતા!
———–
લશ્કરને લગ્નનું આમંત્રણ
આપણા દેશમાં લગ્ન લેવાય ત્યારે ઢગલો કામ હોય. ડેકોરેશન, જમણવાર અને કોને કેવું આમંત્રણ એ મુખ્ય જવાબદારી હોય છે. પ્રસંગ રંગેચંગે પાર પડે અને બધા લગ્નમાં મહાલી શકે એ માટે આગોતરું આયોજન કરવામાં આવે. કંકોતરી લખવા (હવે વોટ્સએપ લિંક મોકલવામાં આવે છે)ના દિવસે શ્રી હરિના નામથી શરૂઆત થાય અને પછી લિસ્ટમાં લખેલા નામ અનુસાર આમંત્રણ અપાતા જાય. તાજેતરમાં કેરળના યુગલ રાહુલ અને કાર્તિકાએ એક કંકોતરી ભારતીય લશ્કરને પણ મોકલી. સોશિયલ મીડિયા પર વાયરલ થયેલી આ કંકોતરીમાં યુગલે દેશ માટે ત્યાગની ભાવના રાખવા બદલ આર્મીનો આભાર માન્યો છે. મેસેજમાં લખવામાં આવ્યું છે કે ‘પ્રિય જાંબાઝ સૈનિકો, તમારા દેશપ્રેમ અને દેશભક્તિ બદલ અમે ગૌરવ અનુભવીએ છીએ. સલામત રાખવા બદલ અને અમે મીઠી નીંદર લઈ શકીએ છીએ એ બદલ આપના ઋણી છીએ. તમારા પ્રતાપે જ અમારો લગ્ન પ્રસંગ રંગેચંગે ઉજવાશે. લગ્નમાં પધારવા અમારું ભાવભર્યું આમંત્રણ છે. જરૂરથી પધારી અમને આશીર્વાદ આપજો.’ આ આમંત્રણ મેળવી ભાવવિભોર થયેલા ભારતીય લશ્કરના અધિકારીએ આમંત્રણ પત્ર સોશિયલ મીડિયામાં શેર કરી લખ્યું કે ‘હાર્દિક શુભેચ્છાઓ. લગ્નના આમંત્રણ બદલ ઈન્ડિયન આર્મી રાહુલ અને કાર્તિકાનો આભાર માને છે અને સુખી લગ્ન જીવનની મનોકામના વ્યક્ત કરે છે.’ આવું આમંત્રણ મોકલવા બદલ યુગલ એક સલામનું તો હકદાર છે જ, શું કયો છો?
———-
મનુષ્ય જીવનમાં જોડિયા બાળકોની નવાઈ નથી. માહિતી મુજબ વિશ્ર્વમાં દર ૪૨ બાળજન્મમાં એક જન્મ જોડિયા બાળકોનો હોય છે. પ્રાણી વિશ્ર્વની વાત કરીએ તો માદા શ્ર્વાન એક ગર્ભધારણમાં ૪ – ૫ ગલૂડિયાંને જન્મ આપે એ સામાન્ય કહેવાય છે. બકરી, હરણ, ઘેટું વગેરે જોડિયા સંતાનને જન્મ આપવા માટે જાણીતા છે. જોકે, મહાકાય હાથી જોડિયા મદનિયાને જન્મ આપે એ વિલક્ષણ ઘટના ગણાય છે. પ્રાણી સંગ્રહાલયની માહિતી અનુસાર ફક્ત એક ટકો મદનિયાં જ ટ્વિન્સ હોય છે અને જન્મતા જોડિયા કાં તો મૃત અવસ્થામાં જ અવતર્યા હોય અથવા શારીરિક નબળાઈ એટલી હોય કે ઝાઝું જીવે નહીં. અધૂરામાં જન્મ પ્રક્રિયામાં ઘણી વાર માતાનું અવસાન થતું હોય છે. જોકે, યુએસના ન્યૂયોર્ક પ્રાણી સંગ્રહાલયમાં માલી નામની હાથણીએ કોઈ પણ તકલીફ વિના ૨૪ ઓક્ટોબરે જોડિયા મદનિયાને જન્મ આપ્યો છે અને યોગ્ય દેખભાળ અને સારવારને પગલે બંનેની તબિયત સારી છે. યુએસએના ઈતિહાસમાં હાથણીને જોડિયા અવતર્યા હોવાની આ પહેલી જ ઘટના છે. પ્રાણી સંગ્રહાલયની ટીમ આ ઘટનાથી બેહદ ખુશ છે અને લુપ્ત થઈ રહેલા હાથીના અસ્તિત્વ પર એની વિધાયક અસરો વિશ્ર્વભરમાં થશે એવું તેમનું માનવું છે.
———–
જૂતાંની લિલામી પોણા બે કરોડ રૂપિયામાં!
ટેક્નોલોજીની દુનિયામાં સ્ટીવ જોબ્સ અને તેણે સ્થાપેલી એપલ કંપનીનું શું અને કેવું મહત્ત્વ છે એ વાત જગજાહેર છે. યુએસના કેલિફોર્નિયાના જે ઘરમાં સ્ટીવ ભાઈ એપલના સહ સ્થાપક બની શરૂઆત કરી એ ઘર ઐતિહાસિક તો છે જ, એ જ ઘરમાં જે સેન્ડલ પહેરી મિસ્ટર જોબ્સ આંટા મારી કંપનીના ઉજ્જવળ ભવિષ્ય માટે યોજના વિચારતા હતા એ સેન્ડલનું તાજેતરમાં લિલામ કરવામાં આવતા એના ૨,૧૮,૦૦૦ ડૉલર ઉપજ્યા (આશરે પોણા બે કરોડ રૂપિયા) હતા. લિલામી કંપનીએ આપેલી માહિતી અનુસાર ૧૯૭૦ના દાયકાના મધ્ય ભાગમાં ખરીદવામાં આવેલી સેન્ડલની જોડીના ઉપજેલા દામનો આ વિક્રમ છે. નોંધવા જેવી વાત એ છે કે અધિક વપરાશને કારણે સેન્ડલમાં સ્ટીવ જોબ્સના પગની છાપ જળવાઈ રહી છે. ઘણા વર્ષોના વપરાશ પછી આ સેન્ડલને યોગ્ય આકાર આપી એની જાળવણી કરવામાં આવી હતી. લિલામમાં આ સેન્ડલના બહુ બહુ તો ૬૦૦૦૦ ડોલર ઉપજવાની ગણતરી હતી. જોકે, એના સાડા ત્રણ ગણા પૈસા મળતા આશ્ર્ચર્ય અને આનંદની લાગણી ફેલાઈ ગઈ હતી. સ્ટીવ જોબ્સ અને સ્ટીવ વોઝનિકે ૧૯૭૬માં એપલ કંપનીની સ્થાપના કરી હતી. ૨૦૧૧માં જોબ્સનું કેન્સરની બીમારીથી અવસાન થયા પછી ૨૦૧૩માં કેલિફોર્નિયાની પ્રોપર્ટીને ઐતિહાસિક દરજ્જો એનાયત થયો હતો.

LEAVE A REPLY

Please enter your comment!
Please enter your name here
Captcha verification failed!
CAPTCHA user score failed. Please contact us!
RELATED ARTICLES

Most Popular