(વાણિજ્ય પ્રતિનિધિ તરફથી)
મુંબઈ: લંડન મેટલ એક્સચેન્જ ખાતે આજે વિવિધ ધાતુઓના ભાવમાં મિશ્ર વલણ રહ્યું હોવાના નિર્દેશો સાથે સ્થાનિક જથ્થાબંધ ધાતુ બજારમાં પણ વેપારો છૂટાછવાયા રહેતાં ભાવમાં મિશ્ર વલણ જોવા મળ્યું હતું. જોકે, આજે મુખ્યત્વે નિકલમાં સ્ટોકિસ્ટોની આક્રમક વેચવાલીનું દબાણ રહેતાં ભાવમાં કિલોદીઠ રૂ. ૨૫નો ઘટાડો આવ્યો હતો. આ સિવાય કોપરની અમુક વેરાઈટીઓ અને ઝિન્ક સ્લેબમાં સ્ટોકિસ્ટોની છૂટીછવાઈ વેચવાલી અને માગ નિરસ રહેતાં ભાવમાં કિલોદીઠ રૂ. ૧થી પાંચનો ઘટાડો આવ્યો હતો. જોકે, આજે માત્ર લીડ ઈન્ગોટ્સ અને કોપર યુટેન્સિલ્સ સ્ક્રેપમાં ઔદ્યોગિક વપરાશકારોની માગને ટેકે ભાવમાં અનુક્રમે કિલોદીઠ રૂ. ૩ અને રૂ. ૧નો સુધારો આવ્યો હતો, જ્યારે અન્ય ધાતુઓમાં ટકેલું વલણ રહ્યું હતું.
બજારનાં સાધનોના જણાવ્યાનુસાર ગઈકાલે નિકલના ભાવમાં કિલોદીઠ રૂ. ૫૦નો ઉછાળો આવ્યા બાદ આજે સ્ટોકિસ્ટોની નફારૂપી વેચવાલીનું દબાણ તેમ જ વપરાશકાર ઉદ્યોગ અને સ્થાનિક ડીલરોની માગ નિરસ રહેતાં ભાવ કિલોદીઠ રૂ. ૨૫ ઘટીને રૂ. ૨૪૫૦ના મથાળે રહ્યા હતા. આ સિવાય અન્ય ધાતુઓ જેમાં સ્ટોકિસ્ટોની છૂટીછવાઈ વેચવાલી અને ઔદ્યોગિક વપરાશકારો તથા સ્થાનિક ડીલરોની માગ નિરસ રહેતાં ભાવમાં ઘટાડાતરફી વલણ જોવા મળ્યું હતું તેમાં કોપર કેબલ સ્ક્રેપ, કોપર સ્ક્રેપ હેવી અને ઝિન્ક સ્લેબના ભાવ કિલોદીઠ રૂ. પાંચ ઘટીને અનુક્રમે રૂ. ૬૮૩, રૂ. ૬૭૩ અને રૂ. ૨૬૭, કોપર આર્મિચરના ભાવ કિલોદીઠ રૂ. ૩ ઘટીને રૂ. ૬૫૩ અને કોપર વાયરબારના ભાવ કિલોદીઠ રૂ. ૧ ઘટીને રૂ. ૭૫૧ના મથાળે રહ્યા હતા.
ધાતુમાં છૂટાછવાયા વેપારે મિશ્ર વલણ
