(વાણિજ્ય પ્રતિનિધિ તરફથી)
મુંબઈ: આંતરરાષ્ટ્રીય વિનિમય બજારમાં ડૉલર ઈન્ડેક્સ નબળો પડ્યો હોવા છતાં અમેરિકાના રોજગારીના ડેટાની જાહેરાત પૂર્વે આજે લંડન ખાતે સત્રના આરંભે રોકાણકારોએ સોનામાં નવી લેવાલીમાં સાવચેતીનો અભિગમ અપનાવ્યો હોવાથી ભાવમાં ઘટાડાતરફી વલણ રહ્યું હતું. આમ વૈશ્ર્વિક બુલિયન માર્કેટના નિરુત્સાહી અહેવાલ તેમ જ સ્થાનિક ફોરેક્સ માર્કેટમાં આજે ડૉલર સામે રૂપિયામાં ૩૭ પૈસાનો ઉછાળો આવ્યો હોવાથી સ્થાનિકમાં સોનાની આયાત પડતરમાં ઘટાડો થવાને કારણે આજે હાજરમાં સોનાના ભાવમાં ૧૦ ગ્રામદીઠ રૂ. ૩૪૪થી ૩૪૬નો ઘટાડો આવ્યો હતો, જ્યારે ચાંદીમાં સ્ટોકિસ્ટોની સટ્ટાકીય વેચવાલીનું દબાણ રહેતાં ભાવમાં કિલોદીઠ રૂ. ૧૬૯૩નો કડાકો બોલાઈ ગયો હતો.
સ્થાનિક સોના-ચાંદી બજારમાં આજે મુખ્યત્વે .૯૯૯ ટચ ચાંદીમાં સ્ટોકિસ્ટોની ઊંચા મથાળેથી સટ્ટાકીય વેચવાલીનું દબાણ અને ઔદ્યોગિક વપરાશકારો તથા જ્વેલરી ઉત્પાદકોની લેવાલી ખપપૂરતી મર્યાદિત રહેતાં ભાવ કિલોદીઠ રૂ. ૧૬૯૩ના ઘટાડા સાથે રૂ. ૬૮,૦૦૦ની સપાટીની અંદર ઊતરીને રૂ. ૬૭,૬૭૮ના મથાળે રહ્યા હતા. વધુમાં આજે સોનામાં પણ વિશ્ર્વ બજારના નરમાઈતરફી અહેવાલ અને રૂપિયો મજબૂત થતાં ઊંચા મથાળેથી સ્ટોકિસ્ટો, રોકાણકારો, જ્વેલરી ઉત્પાદકો તેમ જ રિટેલ સ્તરની લેવાલી ખપપૂરતી રહેતાં ૯૯.૫ ટચ સ્ટાન્ડર્ડ સોનાના ભાવ રૂ. ૩૪૪ ઘટીને રૂ. ૫૫,૫૭૩ અને ૯૯.૯ ટચ સ્ટાન્ડર્ડ સોનાના રૂ. ૩૪૬ ઘટીને રૂ. ૫૫,૭૯૬ના મથાળે રહ્યા હતા.
દરમિયાન આજે લંડન મેટલ એક્સચેન્જ ખાતે સત્રના આરંભે ખાસ કરીને ડૉલર ઈન્ડેક્સમાં નરમાઈનું વલણ રહેતાં હાજર અને વાયદામાં સોનાના ભાવ ગઈકાલના બંધથી સાધારણ ૦.૩ ટકા ઘટીને અનુક્રમે ઔંસદીઠ ૧૮૪૮ ડૉલર અને ૧૮૫૪.૨૦ ડૉલર આસપાસ ક્વૉટ થઈ રહ્યા હતા. જોકે, હવે રોકાણકારોની નજર અમેરિકાના જાહેર થનારા સાપ્તાહિક જોબ ડેટા પર સ્થિર થઈ હોવાથી સોનામાં સુધારો મર્યાદિત રહ્યો હોવાનું સૂત્રોએ જણાવ્યું હતું. વધુમાં આજે સત્રના આરંભે હાજરમાં ચાંદીના ભાવ સાંકડી વધઘટે અથડાઈને ગઈકાલની જ ઔંસદીઠ ૨૩.૭૪ ડૉલર આસપાસની સપાટીએ ક્વૉટ થઈ રહ્યા હતા.
વૈશ્ર્વિક બજારમાં આજે ડૉલર ઈન્ડેક્સ નબળો પડતાં સોનાના ભાવમાં સુધારાતરફી વલણ જોવા મળ્યું હતું. તેમ છતાં આજે મોડી સાંજે અમેરિકામાં એડીપી નેશનલ એમ્પ્લોયમેન્ટ રિપોર્ટની જાહેરાત થનાર છે, જ્યારે આવતીકાલે શુક્રવારે અમેરિકી શ્રમ મંત્રાલય દ્વારા નોન ફાર્મ પેરોલ ડેટાની જાહેરાત થનાર છે. એકંદરે અમેરિકી ફેડરલ રિઝર્વ વ્યાજદરમાં વધારાના નિર્ણયમાં રોજગારીના ડેટા મહત્ત્વનો ભાગ ભજવતા હોવાથી રોકાણકારોની રોજગારીના ડેટા પર નજર હોવાથી સુધારો મર્યાદિત રહ્યો હોવાનું વિશ્ર્લેષકોએ જણાવ્યું હતું. જોકે, ગઈકાલે મોડી સાંજે જાહેર થયેલી અમેરિકી ફેડરલ રિઝર્વની છેલ્લી નીતિવિષયક બેઠકની મિનિટ્સમાં તમામ નીતિ ઘડવૈયાઓ વ્યાજદરમાં ધીમી ગતિએ વધારો કરવા માટે સહમત થયા હોવાનું જાણવા મળ્યું હતું.
સોનામાં ₹ ૩૪૬નો અને ચાંદીમાં ₹ ૧૬૯૩નો કડાકો
