પ્રજામત

પ્રજામત

દેશદ્રોહ કાયદો
આપણા ભારત દેશની ન્યાયપ્રણાલી ઘણી જૂની એટલે કે બ્રિટિશરોએ બનાવેલી છે અને એમાં તાત્કાલિક સુધારાની જરૂર છે. જે સમયાનુસાર જરૂરી છે. મોદી સરકારે આ બાબત પહેલ કરી છે અને સેંકડો બિનજરૂરી કાયદાઓ રદ કર્યા છે. આ પ્રક્રિયા ચાલુ છે. આવો જ એક કાયદો દેશદ્રોહ માટે છે. જેનું અર્થઘટન વિશાળ છે. જ્યારે કોઈ વ્યક્તિનો રાજકીય કારણોસર બદલો લેવાનો હોય કે એને થોડો વખત રાજકારણથી દૂર રાખવાની હોય ત્યારે સત્તાધીશના ઈશારે એની ધરપકડ કરી જેલમાં મોકલવામાં આવે છે અને એને જામીન ન મળે એ પ્રમાણેના કાયદાનો આશરો લેવામાં આવે છે. રાજદ્રોહ એવો જ કાયદો છે. હમણા મુખ્ય મંત્રીના ઘરની સામે હનુમાન ચાલીસા ગાવાના પ્રયાસ બદલ વિધાનસભ્ય નવનીત રાણા અને એમના પતિની ધરપકડ કરી જેલમાં મોકલ્યાં અને રાજદ્રોહનો આરોપ લગાડવામાં આવ્યા. હવે હનુમાન ચાલીસા ગાવા કે જાહેરમાં એનો પાઠ કરવો એમાં દેશદ્રોહ ક્યાં થાય? માની લીધું કે એનાથી કાયદો વ્યવસ્થાની સમસ્યા થાય પણ એમને જામીન મળી જાય એટલે બિનજામીનપાત્ર કલમથી એફઆઈઆર થઈ. ખેર હવે કેસ હાઇ કોર્ટ અને પછી સુપ્રીમ કોર્ટમાં જશે એટલે બધુ સ્પષ્ટ થઈ જશે, પણ ફક્ત રાજકીય કારણસર ધરપકડ કરવાની પોલીસની સત્તા પર થોડા નિયંત્રણની જરૂર તો છે જ.

  • જીતેન્દ્ર શાહ

હૈદરાબાદ

બેરોજગારી અને આત્મહત્યા
કહેવાય છે કે સેન્ટર ફોર ઇકોનોમિક્સ એન્ડ બિઝનેસ રિસર્ચ-લંડનની ગત ડિસેમ્બર, ૨૦૨૧ની આગાહી મુજબ ભારત વર્ષ ૨૦૩૧ સુધીમાં વિશ્ર્વનું ત્રીજું વિશાળ અર્થતંત્ર ધરાવતો દેશ બની જશે. પરંતુ પ્રસ્તુત આનંદજનક તસવીરનું એક ચિંતાજનક પાસું પણ છે. સંસદમાં સરકારે રજૂ કરેલ આંકડા જણાવે છે કે છેલ્લાં ૦૬ વર્ષમાં બેરોજગારી વધી છે અને બેરોજગાર યુવકોમાં આત્મહત્યાની ટકાવારી પણ વધી છે. નેશનલ ક્રાઈમ રેકોર્ડ બ્યૂરોના એક અહેવાલ અનુસાર વર્તમાન સરકારના શાસન ૨૦૧૪-૨૦૨૦ દરમિયાન કુલ ૧૮,૭૭૨ લોકોએ બેરોજગારીને કારણે આત્મહત્યા કરી. એટલે કે પ્રતિ વર્ષ ૨,૬૮૧ અને દર ૦૩.૨૭ કલાકે ૦૧ આત્મહત્યા. નેશનલ કાઉન્સિલ ઓફ એપ્લાઇડ ઈકોનોમિક રિસર્ચના રોજગાર દર અને બેરોજગાર દરનો સંયુક્તપણે અભ્યાસ કરીએ તો છેલ્લાં ૦૫ વર્ષમાં કમાણીની ઉંમર (૧૫થી ૨૯ વર્ષના)માં કુલ ૧૨ કરોડ યુવાનો વધે છે, પરંતુ તે પૈકી ૦૧.૪૦ કરોડ રોજગાર ઘટ્યા છે. તદુપરાંત ઇન્ટરનેશનલ લેબર ઓર્ગેનાઈઝેશનના એક રિપોર્ટ મુજબ ભારતમાં કમાણીની ઉંમર ૧૫ થી ૨૪ વર્ષની ‘યુવા રોજગારી’ ૨૩ ટકાની ઉચ્ચતમ સપાટીએ પહોંચી ગઈ છે. આ સંદર્ભે સઘળો દોષ કોરોના મહામારી પર નાખવો નિરર્થક છે. કારણ કે તે પછી વર્ષ એપ્રિલ ૨૦૨૨માં બેરોજગારીનો સૌથી વધુ દર ૦૮.૦૯ ટકા જોવા મળ્યો છે. વિશેષ, દેશના યુવાનોને ઉજ્જવળ ભારતનું સ્વપ્ન બતાવવાનું એક નકારાત્મક પાસું એ છે કે બેરોજગાર યુવાનોને લાગે છે કે તેઓ જ આ બાબતમાં એ સમયે નિષ્ફળ છે. જ્યારે અન્યો- ખાસ કરીને વ્યાપારીઓ અને ઉદ્યોગપતિઓ સફળતાના માર્ગે હરણફાળ કૂદકા મારી રહ્યા છે. ટૂંકમાં ભારત સરકારની અર્થતંત્ર મામલે એવી નીતિ હોવી જોઈએ કે વર્તમાન કે ભાવિ આર્થિક વિકાસ, અર્થશાસ્ત્રી નિકોલસ પર્નાએ વ્યાખ્યાયિત કરેલ ‘રોજગારરહીન વિકાસ’ (જોબલેસ ગ્રોથ)નું કારણ ન બને.

– પ્રા. જે. આર. વઘાશિયા, સુરત

જાહેર ચેતવણી-રેલવેના યાત્રીઓને
રેલવેમાં સિનિયર સિટિઝન જ્યારે ઓનલાઈન ટિકિટ બુક કરાવે છે ત્યારે આઈ.આર.સી.ટી.સી.માં ૨ વિકલ્પવાળું ઓપ્શન આપવામાં આવે છે. તમો – યાત્રીઓ ક્ધસેશન લેવાનું ચાલુ રાખવા માગતા હોય ત્યારે યસ / નો ને બદલે છેતરામણા શબ્દો લખવામાં આવે છે જેમ કે ઓ.કે. – ક્ધસેશન જતું કરવા માટે, કેન્સલ- ક્ધસેશન લેવા માગુ છું.ની સંમતી સૂચવે છે. હવે સામાન્ય સમજ એવી હોય છે કે ઓ.કે.નો મતલબ ચાલુ રાખવા માટે છે અને કેન્સલનો મતલબ ક્ધસેશન જતું કરવા માટે.
હવે એક વાર ભૂલથી ઓ.કે. ક્લિક થયું તો યાત્રીનું ક્ધસેશન કાયમ માટે જતું રહે છે.
મહેરબાની કરીને રેલવેને નમ્ર વિનંતી આવી યુક્તિ અજમાવવાના પ્રયત્ન ના કરે.

  • મહેશ વેદાંત
    અંધેરી (ઇસ્ટ).

1 thought on “પ્રજામત

પ્રતિસાદ આપો

તમારું ઇમેઇલ સરનામું પ્રકાશિત કરવામાં આવશે નહીં.