(અમારા પ્રતિનિધિ તરફથી)
મુંબઈ: મહારાષ્ટ્ર રાજ્ય રોડ ડેવલપમેન્ટ કોર્પોરેશન તરફથી ઈસ્ટર્ન એક્સપ્રેસ હાઈવે પર કલ્વટરના ચાલી રહેલા કામ દરમિયાન મુલુંડ જકાત નાકા પરિસરમાં હરિ ઓમ નગરમાં પાલિકાની ૨,૩૪૫ મિલીમીટર વ્યાસની ‘મુંબઈ-૨’ પાઈપલાઈનને નુકસાન થયું હતું. સોમવાર રાતથી ચાલુ કરવામાં આવેલું કામ તેની નક્કી કરેલા સમય કરતા ૧૫ કલાક વહેલું પૂરું કરવામાં મુંબઈ મહાનગરપાલિકાને સફળતા મળી હતી.
પાલિકાના પાણીપુરવઠા ખાતાએ સળંગ ૩૬ કલાક સમારકામ કર્યું હતું, જે બુધવાર ૨૯ માર્ચ, ૨૦૨૩ના વહેલી સવારના પાંચ વાગે પૂરું થયું હતું. પાલિકાએ ચાર અલગ-અલગ ખાતાની ટીમ બનાવી હતી. કુલ ૧૨ ઍન્જિનિયર અને ૩૦ કર્મચારીની મદદથી આ કામ પૂરું કરવામાં આવ્યું હતું.
બુધવારે સવારના પાંચ વાગે આ કામ પૂરું થયું હતું. તેથી મુંબઈનો પાણીપુરવઠો પૂર્વવત થશે. આ કામને કારણે શહેર અને પૂર્વ ઉપનગરના વિસ્તારમાં સોમવાર ૨૭ માર્ચ, ૨૦૨૩ના રાતના ૧૦ વાગ્યાથી બુધવાર ૨૯ માર્ચ, ૨૦૨૩ રાતના ૧૦ વાગ્યા સુધી ૧૫ ટકા પાણીકાપ મૂકવામાં આવ્યો હતો.
