આજના સમયમાં મહિલાઓની સુરક્ષા એ બહુ મોટો મુદ્દો છે અને દેશની મહિલાઓની સુરક્ષાને ધ્યાનમાં રાખીને કેન્દ્ર સરકાર દ્વારા મહત્વનો નિર્ણય લેવામાં આવ્યો છે. કેન્દ્ર સરકારે દેશના આઠ એવા શહેરની પસંદગી કરવામાં આવી છે કે જેને મહિલાઓ માટે સૌથી સુરક્ષિત બનાવવા માટે એક ખાસ યોજના તૈયાર કરવામાં આવી છે. આ વિશેષ યોજના હેઠળ પોલીસ અને મહાનગરપાલિકાની ખામીઓને સુધારવા માટે મહિલાઓ પાસેથી સૂચનો લેવામાં આવશે. જેથી તેને સંપૂર્ણ રીતે મજબુત અને તેમાં સુધારા વધારા કરી શકાય અને તેની સાથે જ આ મોડલ દેશના અન્ય શહેરોમાં પણ લાગુ કરવામાં આવશે. સરકારે આ સેફ સિટી પ્રોજેક્ટને આ વર્ષના અંત સુધી એટલે કે ડિસેમ્બર 2023 સુધીમાં પૂર્ણ કરવાનું લક્ષ્ય રાખ્યું છે.
મહિલા અને બાળ વિકાસ મંત્રાલયના સચિવ ઈન્દિવર પાંડેએ નિર્ભયા ફંડ કમિટીની 29મી માર્ચની બેઠક અને સેફ સિટી પ્રોજેક્ટની ધીમી ગતિ અંગે ચિંતા વ્યક્ત કરી છે. મંત્રાલયના એક વરિષ્ઠ અધિકારીના જણાવ્યા અનુસાર, પ્રોજેક્ટ માટે નિર્ભયા ફંડમાં 2840.05 કરોડ રૂપિયાની જોગવાઈ કરવામાં આવી છે. તેમાંથી રૂ. 888.94 કરોડ રાજ્ય સરકારને આપવાના છે. કમિટીએ એવો પણ આદેશ આપ્યો છે કે સેફ સિટી પ્રોજેક્ટ આ વર્ષ સુધીમાં પૂરો કરવાનો છે.
આ સમિતિના અધિકારીએ વધુમાં એવું પણ જણાવ્યું હતું કે પ્રોજેક્ટ હેઠળ દિલ્હી, લખનૌ, ચેન્નઈ, મુંબઈ, અમદાવાદ, હૈદરાબાદ, કોલકાતા, બેંગલુરુને દેશના સૌથી સુરક્ષિત શહેરના મોડલ પર ઊભા રહેવાનું છે. શહેરોમાં સ્માર્ટ પલ્સિંગ માટે પણ નક્કર વ્યવસ્થા કરવામાં આવશે. આ સાથે કેટલીક પસંદગીની જગ્યાઓ પર મહિલાઓ માટે પસંદગીની વાનમાં વ્યવસ્થા કરવામાં આવશે. ડ્રોન અને સીસીટીવી કેમેરા પણ ફીટ કરવામાં આવશે. આ સાથે મહિલા શૌચાલય, રસ્તાઓની ચારે બાજુ લાઇટની વ્યવસ્થા અને રાત્રિના સમયે ટુ વ્હીલરથી લઇને ફોર વ્હીલર સુધીના વાહનો પર મહિલા પોલીસ દ્વારા પેટ્રોલિંગની વ્યવસ્થા કરવામાં આવશે.
આ વ્યવસ્થા સેફ સિટી પ્રોજેક્ટ હેઠળ કરવામાં આવશે
- આ પ્રોજેક્ટ અમલમાં મૂકાયા બાદ લખનઉમાં 111 પિંક પેટ્રોલ, 100 પિંક બૂથ, 47 પિંક વોશરૂમ, 3625 સ્ટ્રીટ લાઇટ લગાવવાની યોજના બનાવવામાં આવી છે. આ સાથે સાથે જ એક સ્માર્ટ કંટ્રોલ રૂમ પણ ઉભો કરવામાં આવશે. જ્યાં બેસીને દરેક બાબત પર નજર રાખવામાં આવશે.
- આ સિવાય દેશની રાજધાની દિલ્હીમાં મહિલા કોન્સ્ટેબલ્સ માટે 88 વેન ખરીદવાની સાથે કેન્દ્ર સરકાર દ્વારા 10,000 કેમેરા ખરીદવાની મંજૂરી આપવામાં આવી છે.
- ગુજરાતના અમદાવાદમાં સાયબર યુનિટમાં 40 અભય વાન, ડિઝાસ્ટર સેન્ટર, સર્વિલોઝ વાહનો તેમ જ બે મહિલા કોન્સ્ટેબલની નિમણૂક કરવામાં આવશે.
- બેંગ્લોરમાં 100 પોલ પર કેમેરા ફીટ કરવામાં આવશે અને આ તેની મદદથી આસપાસની ગતિવિધિઓ પર નજર રાખી શકાય. આ બધા માટે એક કોમન સેન્ટરની વ્યવસ્થા કરવામાં આવશે.
- અપરાધને અટકાવવા માટે ચેન્નાઈમાં સાયબર સેલની સ્થાપના કરવામાં આવશે. જેમાં 500 બસમાં પેનિક બટન, પિંક પેટ્રોલ વાહનો સહિત શાળા-કોલેજોમાં જાગૃતિ માટે વિવિધ ઉપક્રમો હાથ ધરવામાં આવશે.
- લાસ્ટ બટ નોટ ધ લીસ્ટ કોલકાતામાં પણ મહિલાઓની સુરક્ષા માટે 155 પેટ્રોલ વાહનો, 70 સ્કૂટી, 25 પોર્ટેબલ બાયો ટોયલેટ, 10 મોબાઈલ ચેઝિંગ વાન, 1020 સીસીટીવી કેમેરાની પણ વ્યવસ્થા કરવામાં આવશે.
