વેપાર અને વાણિજ્યશેર બજાર

ફેડરલના આક્રમક વલણ સાથે તળિયુ શોધતા સોનાચાંદીના ભાવ

ચાંદીમાં રૂ. ૪૪૯૦નો અને સોનામાં રૂ. ૧૧૪૨નો કડાકો

(વાણિજ્ય પ્રતિનિધિ તરફથી)

મુંબઈ: અમેરિકી ફેડરલ રિઝર્વ લાંબા સમયગાળા સુધી ઊંચા વ્યાજદર જાળવી રાખે તેવાં ફેડરલના સભ્યો તરફથી મળી રહેલા અણસારોને ધ્યાનમાં લેતાં ગઈકાલે વિશ્વ
બજારમાં સોનાના ભાવમાં એક ટકા જેટલો અને ચાંદીના ભાવમાં ૨.૭ ટકા જેટલો ઘટાડો થયા બાદ આજે લંડન ખાતે સત્રના આરંભે સતત બીજા સત્રમાં પણ વેચવાલીના દબાણે ઑલ ફૉલ ડાઉનનું વલણ જોવા મળ્યું હતું. આમ વૈશ્વિક નિરુત્સાહી અહેવાલ સાથે સ્થાનિક ઝવેરી બજારમાં પણ મધ્યસત્ર દરમિયાન ચાંદીના ભાવ કિલોદીઠ રૂ. ૪૪૯૦ના કડાકા સાથે રૂ. ૬૮,૦૦૦ની સપાટીની અંદર ઉતરી ગયા હતા, જ્યારે સોનાના ભાવ ૧૦ ગ્રામદીઠ રૂ. ૧૧૩૮થી ૧૧૪૨ના કડાકા સાથે રૂ. ૫૭,૦૦૦ની અંદર ઉતરી ગયા હતા.

નોંધનીય બાબત એ છે કે ગઈકાલે સ્થાનિક બજાર ગાંધી જયંતી નિમિત્તે બંધ રહ્યા હતા. જોકે, આજે આ અહેવાલ લખાઈ રહ્યો છે ત્યારે સ્થાનિક ફોરેક્સ માર્કેટમાં ડૉલર સામે રૂપિયો ૧૨ પૈસા નબળો પડ્યો હોવાથી સ્થાનિકમાં સોનાની આયાત પડતરમાં વધારો થવાથી વિશ્વ બજારની સરખામણીમાં ભાવઘટાડો મર્યાદિત રહ્યો હતો.

બજારનાં સાધનોના જણાવ્યાનુસાર આજે સ્થાનિકમાં મધ્યસત્ર દરમિયાન ખાસ કરીને .૯૯૯ ટચ ચાંદીમાં સ્ટોકિસ્ટોની સટ્ટાકીય વેચવાલીના દબાણ સામે વધુ ઘટાડાના આશાવાદે નવી લેવાલીનો અભાવ તેમ જ ઔદ્યોગિક વપરાશકારો તથા જ્વેલરી ઉત્પાદકોની માગ ખપપૂરતી રહેતાં ભાવ ગત શુક્રવારના બંધ ભાવની સરખામણીમાં કિલોદીઠ રૂ. ૪૪૯૦ના ઘટાડા સાથે રૂ. ૬૭,૧૧૩ના મથાળે રહ્યા હતા.


તે જ પ્રમાણે સોનામાં પણ સ્ટોકિસ્ટોની વેચવાલી સામે નવી લેવાલીમાં નિરસતા તેમ જ જ્વેલરી ઉત્પાદકો તથા રિટેલ સ્તરની લેવાલી પણ પાંખી રહેતાં ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૧૧૩૮ ઘટીને રૂ. ૫૬,૩૫૦ અને ૯૯.૯ ટચ સ્ટાન્ડર્ડ સોનાના રૂ. ૧૧૪૨ના ઘટાડા સાથે રૂ. ૫૬,૫૭૭ના મથાળે રહ્યા હતા.

ગઈકાલે અમેરિકાના ઉત્પાદનના ડેટા પ્રોત્સાહક આવ્યા હોવાથી અમેરિકી અર્થતંત્રમાં મક્કમ વલણ જળવાઈ રહ્યું હોવાનું જણાતા ફેડરલ રિઝર્વ લાંબા સમયગાળા સુધી ઊંચા વ્યાજદર જાળવી રાખે તેવી શક્યતાને ધ્યાનમાં લેતાં આજે વિશ્વ
બજારમાં ડૉલર ઈન્ડેક્સ ૧૦ મહિનાની અને અમેરિકી ટ્રેઝરની યિલ્ડ ૧૬ વર્ષની ઊંચી સપાટીએ પહોંચતાં આજે લંડન ખાતે સત્રના આરંભે સોનામાં ભાવઘટાડો આગળ ધપતાં હાજરમાં ભાવ વધુ ૦.૩ ટકા ઘટીને ઔંસદીઠ ૧૮૨૧.૪૯ ડૉલર અને વાયદામાં ભાવ ૦.૫ ટકા ઘટીને ૧૮૩૭.૪૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ ૦.૨ ટકા ઘટીને સાડા છ મહિનાની નીચી ઔંસદીઠ ૨૧.૦૩ ડૉલરની સપાટી આસપાસ ક્વૉટ થઈ રહ્યા હતા.

અમેરિકી અર્થતંત્ર આશ્ર્ચર્યજનક રીતે મજબૂત અન્ડરટોન દાખવી રહ્યું હોવાથી ફુગાવાની લક્ષ્યાંકિત બે ટકાની સપાટી હાંસલ કરવા માટે ફેડરલ રિઝર્વે લાંબા સમયગાળા સુધી ઊંચા વ્યાજદર જાળવી રાખવા પડે તેમ હોવાથી ડૉલર ઈન્ડેક્સ અને ટ્રેઝરીની યિલ્ડ મજબૂત થતાં સોનાના ભાવ સતત દબાણ હેઠળ આવી રહ્યા હોવાનું એક વિશ્ર્લેષકે જણાવ્યું હતું.

Show More

Related Articles

Leave a Reply

Your email address will not be published. Required fields are marked *

Back to top button
હાઈ બ્લડપ્રેશર છે? ભૂલથી પણ નહીં ખાતા આ વસ્તુઓ… Hina Khan’s Top 10 Stunning Outfits મુંબઈની હતાશ ટીમ માટે સચિનની સંજીવની વહેલાસર કારગત નીવડશે? IPL Mystery Girls : captured on camera went viral