(વાણિજ્ય પ્રતિનિધિ તરફથી)
મુંબઈ: ગઈકાલે ન્યૂ યોર્ક મર્કન્ટાઈલના કૉમેક્સ વિભાગ પર સોનાના ભાવમાં એક ટકા જેટલો ઘટાડો આવ્યા બાદ આજે વૈશ્ર્વિક વિનિમય બજારમાં ડૉલર ઈન્ડેક્સ નબળો પડવાની સાથે અમેરિકી ૧૦ વર્ષીય ટ્રેઝરીની યિલ્ડ પણ છ સપ્તાહની ઊંચી સપાટીએથી પાછી ફરતાં લંડન ખાતે સત્રના આરંભે ધીમો સુધારો જોવા મળ્યો હતો. આમ વૈશ્ર્વિક પ્રોત્સાહક અહેવાલ સાથે સ્થાનિક ઝવેરી બજારમાં પણ સોનામાં ૧૦ ગ્રામદીઠ રૂ. ૮૦નો ધીમો સુધારો આવ્યો હતો. જોકે, ચાંદીમાં સ્ટોકિસ્ટોની વેચવાલીનું દબાણ, નવી લેવાલીનો અભાવ રહ્યો હોવા છતાં ઔદ્યોગિક વપરાશકારોની ખપપૂરતી માગ રહેતાં ભાવ સાધારણ કિલોદીઠ રૂ. ૮નો ઘસરકો આવ્યો હતો.
બજારનાં સાધનોના જણાવ્યાનુસાર આજે સ્થાનિક સોના-ચાંદી બજારમાં એકંદરે બન્ને કીમતી ધાતુઓમાં કામકાજો પાંખાં રહ્યાં હતાં. ખાસ કરીને .૯૯૯ ટચ ચાંદીમાં સ્ટોકિસ્ટોની વેચવાલીના દબાણ સામે ઔદ્યોગિક વપરાશકારો તથા જ્વેલરી ઉત્પાદકોની માગ ખપપૂરતી મર્યાદિત રહેતાં સત્રના અંતે ભાવ કિલોદીઠ રૂ. ૮ના ઘટાડા સાથે રૂ. ૬૭,૮૪૦ના મથાળે રહ્યા હતા. જોકે, સોનામાં જ્વેલરી ઉત્પાદકો અને રિટેલ સ્તરની લેવાલી ખપપૂરતી રહી હતી, પરંતુ વૈશ્ર્વિક પ્રોત્સાહક અહેવાલે સ્ટોકિસ્ટો અને રોકાણકારોની છૂટીછવાઈ લેવાલીને ટેકે ભાવ ૧૦ ગ્રામદીઠ રૂ. ૮૦ વધીને ૯૯.૫ ટચ સ્ટાન્ડર્ડ સોનાના રૂ. ૫૪,૪૩૨ અને ૯૯.૯ ટચ સ્ટાન્ડર્ડ સોનાના રૂ. ૫૪,૬૫૧ના મથાળે રહ્યા હતા.
દરમિયાન આજે લંડન ખાતે સત્રના આરંભે ડૉલર ઈન્ડેક્સ નબળો પડતાં હાજરમાં સોનાના ભાવ ગઈકાલના બંધથી ૦.૩ ટકા વધીને ઔંસદીઠ ૧૮૦૮.૬૫ ડૉલર અને વાયદામાં ભાવ સાંકડી વધઘટે અથડાઈને ગઈકાલની જ ૧૮૧૫.૬૦ ડૉલર આસપાસની સપાટીએ ક્વૉટ થઈ રહ્યા હતા, જ્યારે હાજરમાં ચાંદીના ભાવ ગઈકાલના બંધથી ૦.૭ ટકા વધીને ઔંસદીઠ ૨૩.૭૦ ડૉલર આસપાસ ક્વૉટ થઈ રહ્યા હતા.
એકંદરે આજે રોકાણકારોની નજર મોડી સાંજે જાહેર થનારા સાપ્તાહિક બેરોજગારીના ડેટા પર સ્થિર થઈ હોવાથી સોનામાં સુધારો મર્યાદિત રહ્યો હોવાનું એક વિશ્ર્લેષકે જણાવતાં ઉમેર્યું હતું કે બેરોજગારીના ડેટા મહત્ત્વના છે. જો બેરોજગારીમાં અપેક્ષા કરતાં વધુ વધારો થશે તો ડૉલર નબળો પડશે અને જો ડૉલર નબળો પડશે તો સોનામાં સુધારાતરફી વલણ જોવા મળે તેવી શક્યતા નકારી ન શકાય.