મુંબઈ: વૈશ્ર્વિક વિનિમય બજારમાં ડૉલર ઈન્ડેક્સમાં નરમાઈ, સ્થાનિક ઈક્વિટી માર્કેટમાં સુધારો અને ગઈકાલે વિદેશી સંસ્થાકીય રોકાણકારોની લેવાલી જળવાઈ રહી હોવાના નિર્દેશો સાથે સ્થાનિક ફોરેક્સ માર્કેટમાં ડૉલર સામે રૂપિયો ત્રણ પૈસાના સુધારા સાથે ૮૨.૦૯ના મથાળે બંધ રહ્યો હતો. જોકે, આજે મોડી સાંજે અમેરિકાનાં ફુગાવાના ડેટાની જાહેરાત થવાની હોવાથી કામકાજો પાંખાં રહ્યા હતા.
આજે સ્થાનિકમાં ડૉલર સામે રૂપિયો ગઈકાલના ૮૨.૧૨ના બંધ સામે સુધારાના ટોને ૮૨.૦૮ની સપાટીએ ખૂલ્યા બાદ સત્ર દરમિયાન નીચામાં ૮૨.૧૧ અને ઉપરમાં ૮૨.૦૧ સુધી ક્વૉટ થયા બાદ અંતે ગઈકાલના બંધથી ત્રણ પૈસાના સુધારા સાથે ૮૨.૧૨ના મથાળે રહ્યા હતા. આજે વિશ્ર્વ બજારમાં ડૉલર ઈન્ડેક્સ ગઈકાલના બંધ સામે ૦.૧૫ ટકા ઘટીને ૧૦૨.૦૪ આસપાસ ક્વૉટ થઈ રહ્યો હોવાથી આજે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ ૨૩૫.૦૫ પૉઈન્ટ અને એનએસઈ બૅન્ચમાર્ક નિફ્ટી ૯૦.૧૦ પૉઈન્ટ વધીને બંધ રહ્યો હતો અને ગઈકાલે વિદેશી સંસ્થાકીય રોકાણકારોની ઈક્વિટીમાં રૂ. ૩૪૨.૮૪ કરોડની ચોખ્ખી લેવાલી રહી હોવાથી રૂપિયાના સુધારાને ટેકો મળ્યો હતો. જોકે, આજે વિશ્ર્વ બજારમાં બ્રેન્ટ ક્રૂડતેલના વાયદામાં ભાવ ગઈકાલના બંધથી ૦.૩૨ ટકા વધીને બેરલદીઠ ૮૫.૮૮ ડૉલર આસપાસ ક્વૉટ થઈ રહ્યા હોવાથી તેમ જ કામકાજ પાંખાં રહ્યા હોવાથી સુધારો મર્યાદિત રહ્યો હતો.