(વાણિજ્ય પ્રતિનિધિ તરફથી)
મુંબઈ: આંતરરાષ્ટ્રીય વિનિમય બજારમાં આજે અમુક મુખ્ય ચલણો સામે ડૉલર ઈન્ડેક્સમાં નરમાઈનું વલણ રહેતા સ્થાનિક ફોરેક્સ માર્કેટમાં ડૉલર સામે રૂપિયો ઘટ્યા મથાળેથી સાધારણ છ પૈસાના સુધારા સાથે ૮૨.૭૦ની સપાટીએ બંધ રહ્યો હતો. જોકે, સ્થાનિક ઈક્વિટી માર્કેટમાં નરમાઈ અને વિદેશી સંસ્થાકીય રોકાણકારોની ઈક્વિટીમાં વેચવાલી જળવાઈ રહેતાં રૂયિામાં સુધારો મર્યાદિત રહ્યો હોવાનું સૂત્રોએ જણાવ્યું હતું.
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના ૮૨.૭૬ના બંધ સામે સુધારાના ટોને ૮૨.૬૮ના મથાળે ખૂલ્યા બાદ સત્ર દરમિયાન નીચામાં ૮૨.૮૦ અને ઉપરમાં ૮૨.૬૨ની રેન્જમાં અથડાઈને અંતે ગઈકાલના બંધથી સાધારણ છ પૈસાના સુધારા સાથે ૮૨.૭૦ના મથાળે બંધ રહ્યો હતો.
સૂત્રોના જણાવ્યાનુસાર આજે વિશ્ર્વ બજારમાં ડૉલર ઈન્ડેક્સ ગઈકાલના બંધથી ૦.૦૮ ટકા ઘટીને ૧૦૩.૫૪ ડૉલર આસપાસ ક્વૉટ થઈ રહ્યા હોવાથી રૂપિયાના સુધારાને ટેકો મળ્યો હતો. જોકે, બ્રેન્ટ ક્રૂડતેલના વાયદાના ભાવ ગઈકાલના બંધથી ૧.૬૯ ટકા વધીને બેરલદીઠ ૮૨.૩૬ ડૉલર આસપાસ ક્વૉટ થઈ રહ્યા હોવાથી તેમ જ સ્થાનિક ઈક્વિટી માર્કેટમાં આજે બીએસઈ બૅન્ચમાર્ક સેન્સેક્સ અને એનએસઈ બૅન્ચમાર્ક નિફ્ટીમાં અનુક્રમે ૨૨૦.૮૬ પૉઈન્ટનો અને ૪૩.૧૦ પૉઈન્ટનો ઘટાડો આવવાથી અને ગઈકાલે સ્થાનિક ઈક્વિટી માર્કેટમાં વિદેશી સંસ્થાકીય રોકાણકારોની રૂ. ૧૨૧૮.૧૪ કરોડની ચોખ્ખી વેચવાલી રહેતાં રૂપિયામાં સુધારો મર્યાદિત રહ્યો હતો.