નવી દિલ્હીઃ છૂટક ફુગાવાના દરમાં (કન્ઝ્યુમર પ્રાઇસ ઇન્ડેક્સ) ઘટાડો થયો છે, જેથી એકંદરે મોંઘવારીના દરમાં રાહત થઈ છે. નવા નાણાકીય વર્ષ 2023-24ના પહેલા ત્રણ મહિનામાં એપ્રિલમાં છૂટક મોંઘવારી દર ઘટીને 4.70 ટકા પર આવી ગયો છે, જે માર્ચ 2023માં 5.66 ટકાની સપાટીએ હતો. આ સતત ત્રીજો મહિનો છે જ્યારે ફુગાવાનો દર નીચે આવ્યો છે અને તે 18 મહિનામાં સૌથી નીચા સ્તરે પહોંચી ગયો છે. આ દરમિયાન ખાદ્ય ચીજોની મોંઘવારીનો દર પણ નીચે આવ્યો છે. ખાદ્ય ફુગાવાનો દર 4 ટકાથી નીચે ઘટીને 3.84 ટકા પર આવી ગયો છે, જે માર્ચ 2023માં 4.79 ટકા હતો. એક વર્ષ પહેલા, એપ્રિલ 2022 માં, છૂટક ફુગાવો તેના સર્વોચ્ચ સ્તરે 7.79 ટકા હતો અને ખાદ્ય ફુગાવો 8.31 ટકા હતો.
એપ્રિલમાં ખાદ્યાન્ન અને સંબંધિત ઉત્પાદનોનો મોંઘવારી દર 13.67 ટકા હતો જે માર્ચમાં 15.27 ટકા હતો. દૂધ અને ડેરી ઉત્પાદનોનો મોંઘવારી દર 8.85 ટકા રહ્યો છે જે માર્ચમાં 9.31 ટકા હતો. મસાલાનો મોંઘવારી દર 17.43 ટકા રહ્યો છે. લીલોતરી-શાકભાજીનો મોંઘવારી દર -6.50 ટકા, કઠોળનો મોંઘવારી દર 5.28 ટકા રહ્યો છે.
આગામી દિવસોમાં મોંઘવારી ઘટ્યા બાદ મોંઘી લોનમાંથી રાહતની આશા રાખી શકાય છે. આરબીઆઈ દ્વારા મોંઘવારી દરના સહનશીલતા બેન્ડનું ઉપરનું સ્તર ઘટીને 6 ટકા થઈ ગયું છે. આરબીઆઈની નાણાકીય નીતિની બેઠક જૂન મહિનામં છથી આઠ જૂન દરમિયાન યોજાશે. આઠમી જૂને આરબીઆઈ તેની MPC મીટિંગના નિર્ણયની જાહેરાત કરશે. જો ફુગાવાના મોરચે બધું બરાબર છે, તો સસ્તી લોનની અપેક્ષા રાખી શકાય છે. આરબીઆઈએ 2023-24માં રિટેલ ફુગાવાનો દર 5.20 ટકા રહેવાનો અંદાજ મૂક્યો છે.