દેશમાં વધી રહેલી મોંઘવારી વચ્ચે લોકો માટે રાહતના સમાચાર આવ્યા છે. 1 મે 2023 થી એટલે કે આજથી, કમર્શિયલ એલપીજી સિલિન્ડરની કિંમતમાં ઘટાડો કરવામાં આવ્યો છે. પરિણામે હવે શહેરોમાં ગેસ સિલિન્ડરના ભાવમાં ફેરફાર થયો છે. ઓઈલ માર્કેટિંગ કંપનીઓએ કોમર્શિયલ એલપીજી ગેસ સિલિન્ડરની કિંમતમાં 171.50 રૂપિયાનો ઘટાડો કર્યો છે. આ ઘટાડા સાથે આજથી મુંબઈમાં કોમર્શિયલ સિલિન્ડરની કિંમત 1808.50 રૂપિયા થઇ ગઈ છે.
કોમર્શિયલ સિલિન્ડરની કિંમત કોલકાતામાં 1960.50 રૂપિયા અને ચેન્નાઈમાં 2021.50 રૂપિયા થઇ ગઈ છે. જોકે 14.2 કિલોના એલપીજી સિલિન્ડરની કિંમતમાં કોઈ ફેરફાર કરવામાં આવ્યો નથી. દિલ્હીમાં 19 કિલોના કોમર્શિયલ એલપીજી સિલિન્ડરની છૂટક વેચાણ કિંમત 1856.50 રૂપિયા થઈ ગઈ છે.
કોમર્શિયલ એલપીજી સિલિન્ડરની કિંમતો દર મહિને બદલાતી રહે છે. એપ્રિલમાં કોમર્શિયલ સિલિન્ડરની કિંમતમાં ઘટાડો થયો હતો. 1 એપ્રિલે તેની કિંમતમાં 92 રૂપિયાનો ઘટાડો કરવામાં આવ્યો હતો. જો કે તે પહેલા 1 માર્ચ 2023ના રોજ કોમર્શિયલ સિલિન્ડરની કિંમતમાં 350 રૂપિયાનો વધારો કરવામાં આવ્યો હતો. જ્યારે એક વર્ષ પહેલા 1 મે 2022ના રોજ દિલ્હીમાં LPG કોમર્શિયલ ઉપયોગના સિલિન્ડરની કિંમત 2355.50 રૂપિયા પર પહોંચી ગઈ હતી અને આજે તે ઘટીને 1856.50 રૂપિયા થઈ ગઈ છે.