વડા પ્રધાન નરેન્દ્ર મોદીએ મંગળવારે (23 મે) ઓસ્ટ્રેલિયાના સિડનીમાં ભારતીય સમુદાયના કાર્યક્રમમાં સંબોધન આપ્યું હતું. તેમણે કહ્યું કે જ્યારે હું 2014માં આવ્યો હતો ત્યારે મેં તમને વચન આપ્યું હતું કે તમારે 28 વર્ષ સુધી ભારતના કોઈ વડાપ્રધાનની રાહ જોવી પડશે નહીં. આજે સિડનીમાં આ મેદાનમાં, હું ફરીથી હાજર છું અને હું એકલો નથી આવ્યો, મારી સાથે (ઓસ્ટ્રેલીયાના)વડાપ્રધાન અલ્બેનીઝ પણ આવ્યા છે.
આ કાર્યક્રમમાં મોટી સંખ્યામાં મૂળ ભારતીય લોકો પહોંચ્યા હતા. પીએમ મોદી કહ્યું કે મને ખુશી છે કે ન્યૂ સાઉથ વેલ્સમાં વિદેશી ભારતીય સમુદાયના ઘણા લોકો સક્રિયપણે જાહેર જીવનમાં ભાગ લઈ રહ્યા છે, તેમની છાપ બનાવી રહ્યા છે. આ જ વર્ષે મને ભારતની ધરતી પર અમદાવાદમાં વડા પ્રધાન એન્થોની અલ્બેનીઝનું સ્વાગત કરવાની તક મળી. આજે તેઓ અહીં “લિટલ ઈન્ડિયા” ગેટવેનો શિલાન્યાસ કરવામાં મારી સાથે જોડાયા છે. હું તેમનો ખૂબ ખૂબ આભાર વ્યક્ત કરું છું.
પીએમ મોદીએ કહ્યું કે એક સમય હતો જ્યારે 3C એ ભારત અને ઓસ્ટ્રેલિયા વચ્ચેના સંબંધોને વ્યાખ્યાયિત કર્યા હતા, આ ત્રણ હતા કોમનવેલ્થ, ક્રિકેટ અને કરી. તે પછી, તે 3D- ડેમોક્રસી, ડાયસ્પોરા અને દોસ્તી આવ્યું. જ્યારે હવે 3E બન્યું એટલે એનર્જી, ઈકોનોમી અને એજ્યુકેશન. પરંતુ સત્ય એ છે કે ભારત અને ઓસ્ટ્રેલિયા વચ્ચેના સંબંધોની વાસ્તવિક ઊંડાઈ આ C, D, E કરતાં પણ આગળ છે. આ સંબંધનો સૌથી મજબૂત અને સૌથી મોટો પાયો ખરેખર પરસ્પર વિશ્વાસ અને પરસ્પર આદરનો છે અને તેની પાછળનું વાસ્તવિક કારણ ભારતીય ડાયસ્પોરા છે.
વડાપ્રધાને વધુમાં કહ્યું કે આપણી જીવનશૈલી અલગ-અલગ હોઈ શકે છે, પરંતુ હવે યોગ પણ આપણને જોડે છે. આપણે લાંબા સમયથી ક્રિકેટ સાથે જોડાયેલા છીએ, પરંતુ હવે ટેનિસ અને ફિલ્મો પણ આપણને જોડે છે. આપણે અલગ-અલગ રીતે ખોરાક તૈયાર કરી શકીએ છીએ, પરંતુ માસ્ટરશેફ હવે અમને એક કરી રહ્યા છે. મને જાણીને આનંદ થયો કે તમે બધાએ પણ આઝાદીના અમૃત મહોત્સવની ખૂબ જ ધામધૂમથી ઉજવણી કરી છે. આપણા ક્રિકેટ સંબંધોને 75 વર્ષ પૂર્ણ થયા છે. ક્રિકેટના મેદાન પરની હરીફાઈ જેટલી રસપ્રદ છે, તેટલી જ ઊંડી આપણી મેદાનની બહારની મિત્રતા છે.
ભારતના યુવાનોનો ઉલ્લેખ કરતા પીએમએ કહ્યું કે ભારતમાં ક્ષમતાની કમી નથી. ભારતમાં પણ સંસાધનોની કોઈ કમી નથી. આજે વિશ્વની સૌથી મોટી અને સૌથી યુવા ટેલેન્ટ ફેક્ટરી ભારતમાં છે. તેણે કહ્યું કે ગયા વર્ષે જ્યારે મહાન ક્રિકેટર શેન વોર્નનું નિધન થયું ત્યારે ઓસ્ટ્રેલિયાની સાથે લાખો ભારતીયોએ શોક વ્યક્ત કર્યો હતો. એવું લાગતું હતું કે આપણે કોઈને ગુમાવ્યું છે. આપ સૌનું એક સપનું છે કે આપણો ભારત દેશ પણ એક વિકસિત રાષ્ટ્ર બને. તમારા હૃદયમાં જે સપનું છે તે મારા હૃદયમાં પણ છે.
ભારતીય ફૂડ અંગે પીએમએ કહ્યું કે મેં સાંભળ્યું છે કે હેરિસ પાર્કમાં જયપુર સ્વીટ્સના ચાટકાઝ ‘ચાટ’ અને ‘જલેબી’ ખૂબ જ સ્વાદિષ્ટ હોય છે. હું ઈચ્છું છું કે તમે બધા મારા મિત્ર ઓસ્ટ્રેલિયન પીએમ અલ્બેનીઝને તે જગ્યાએ લઈ જાઓ.
તેમણે કહ્યું કે વિશ્વ બેંકના મતે, જો કોઈ દેશ છે જે વૈશ્વિક વિપરીત પરીસ્થીતીઓનો મજબૂતીથી સામનો કરી રહ્યો છે, તો તે ભારત છે. ભારતે સૌથી પડકારજનક સમયમાં પણ નિકાસનો રેકોર્ડ બનાવ્યો છે. છેલ્લા 9 વર્ષમાં ભારતે ઘણી પ્રગતિ કરી છે. અમે ગરીબો માટે લગભગ 50 કરોડ બેંક ખાતા ખોલાવ્યા છે. એટલું જ નહીં ભારતમાં જાહેર વિતરણની સમગ્ર ઇકો-સિસ્ટમ બદલાઈ ગઈ છે.