(વાણિજ્ય પ્રતિનિધિ તરફથી)
મુંબઈ: લંડન મેટલ એક્સચેન્જ ખાતે વિવિધ ધાતુઓમાં મિશ્ર વલણ રહ્યું હોવાના નિર્દેશો સાથે સ્થાનિક જથ્થાબંધ ધાતુ બજારમાં આજે ખાસ કરીને નિકલ અને ટીનમાં સ્ટોકિસ્ટોની આક્રમક વેચવાલીનું દબાણ રહેતાં ભાવમાં અનુક્રમે કિલોદીઠ રૂ. ૧૧૯નો અને રૂ. ૧૩નો ઘટાડો આવ્યો હતો. આ સિવાય નિરસ માગે લીડ ઈન્ગોટ્સ અને બ્રાસ શીટ કટિંગ્સમાં અનુક્રમે કિલોદીઠ રૂ. ૨ અને રૂ. ૧નો ઘટાડો આવ્યો હતો.
આ સિવાય આજે વૈશ્ર્વિક પ્રોત્સાહક અહેવાલે કોપર, બ્રાસ યુટેન્સિલ્સ સ્ક્રેપ અને ઝિન્ક સ્લેબમાં સ્ટોકિસ્ટોની છૂટીછવાઈ લેવાલી અને વપરાશકાર ઉદ્યોગની માગને ટેકે ભાવમાં કિલોદીઠ રૂ. ૧થી પાંચનો સુધારો આવ્યો હતો અને એલ્યુમિનિમયમમાં ખપપૂરતી માગને ટેકે ભાવ ટકેલા રહ્યા હતા.
બજારનાં સાધનોના જણાવ્યાનુસાર છેલ્લા બે સત્રમાં નિકલના ભાવમાં કિલોદીઠ રૂ. ૯૪નો અને ટીનમાં ગઈકાલે રૂ. ૫૦નો ઉછાળો આવ્યા બાદ આજે ઊંચા મથાળેથી સ્ટોકિસ્ટોની નફારૂપી વેચવાલી અને ઔદ્યોગિક વપરાશકારોની માગ નિરસ રહેતાં નિકલના ભાવ કિલોદીઠ રૂ. ૧૧૯ ઘટીને રૂ. ૨૩૬૩ અને ટીનના ભાવ કિલોદીઠ રૂ. ૧૩ ઘટીને રૂ. ૨૨૦૦ના મથાળે રહ્યા હતા. આ સિવાય લીડ ઈન્ગોટ્સ અને બ્રાસ શીટ કટિંગ્સમાં સ્ટોકિસ્ટોની છૂટીછવાઈ વેચવાલી અને માગ નિરસ રહેતાં ભાવ અનુક્રમે કિલોદીઠ રૂ. બે ઘટીને રૂ. ૧૯૮ અને રૂ. ૧ ઘટીને રૂ. ૫૧૦ના મથાળે રહ્યા હતા.