(અમારા પ્રતિનિધિ તરફથી)
મુંબઈ: મુંબઈગરા વિચિત્ર વાતાવરણનો અનુભવ કરી રહ્યા છે. બે-ત્રણ દિવસથી ગરમી, ઉકળાટ, વાદળિયું અને પ્રદૂષણભર્યું વાતાવરણ મુંબઈમાં રહ્યું હતું. ત્યારે શુક્રવારે અચાનક સવારના સમયે મુંબઈમાં ઠંડીનો માહોલ જણાયો હતો. તો ‘મંદોસ’ વાવાઝોડાની અસર હેઠળ મુંબઈ સહિત મહારાષ્ટ્રના અમુક જિલ્લામાં આગામી ૨૪થી ૪૮ કલાકમાં હળવાથી મધ્યમ વરસાદની આગાહી હવામાન ખાતાએ કરી છે.
મુંબઈ સહિત મહારાષ્ટ્રમાં ફરી એક વખત કમોસમી વરસાદ પડવાની શક્યતા છે. હવામાન ખાતાના અંદાજ મુજબ બંગાળની ખાડીમાં ઉદ્ભવેલું ‘મંદોસ’ વાવાઝોડું ૨૪ કલાકમાં જમીન પર ત્રાટકશે. ત્યાર બાદ બંગાળ ઉપસાગરમાં રહેલા ભેજ અને અરબી સમુદ્રમાંથી ખેંચાનારા ભેજને કારણે વરસાદ માટે અનુકૂળ સ્થિતિ નિર્માણ થશે. તેથી આગામી ૪૮ કલાક બાદ મહારાષ્ટ્રના મોસમમાં ફેરફાર થશે. આ ફેરફારને કારણે ૧૧થી ૧૩ ડિસેમ્બર સુધી કોંકણ, મધ્ય મહારાષ્ટ્ર, મરાઠવાડામાં હળવાથી મધ્યમ વરસાદની સંભાવના છે. કોંકણ પ્રદેશમાં મુંબઈ, થાણેનો પણ સમાવેશ થાય છે. તેથી મુંબઈ સહિત થાણેમાં પણ આગામી ૨૪થી ૪૮ કલાક દરમિયાન વાદળિયું વાતાવરણ રહીને હળવાં વરસાદનાં ઝાપટાં પડી શકે છે.
આ દરમિયાન ઘણા દિવસ બાદ મુંબઈમાં સવારના હળવી ઠંડીનો અનુભવ થયો હતો. સવારના સમયમાં ઠંડા પવનો ફૂંકાઈ રહ્યા હોવાને કારણે છેલ્લા થોડા દિવસથી ગરમી અને ઉકળાટ અનુભવી રહેલા લોકોને થોડી રાહત થઈ હતી. સાંતાક્રુઝમાં લઘુતમ તાપમાન ૧૮.૬ ડિગ્રી તો કોલાબામાં લઘુતમ તાપમાન ૨૨.૦ ડિગ્રી નોંધાયું હતું. જ્યારે સાંતાક્રુઝમાં મહત્તમ તાપમાન ૩૧.૭ ડિગ્રી અને કોલાબામાં ૩૧.૨ ડિગ્રી નોંધાયું હતું.