મુંબઈ: મહારાષ્ટ્રના નાયબ મુખ્ય પ્રધાન દેવેન્દ્ર ફડણવીસની પત્ની અમૃતા ફડણવીસને ક્રિમિનલ કેસમાં હસ્તક્ષેપ કરવા તેમ જ ધમકી આપવા બદલ ધરપકડ કરાયેલી ડિઝાઇનરને શુક્રવારે કોર્ટે ૨૧ માર્ચ સુધીની પોલીસ કસ્ટડી ફટકારી હતી.
ડિઝાઇનર અનિક્ષા જયસિંઘાનીની ગુરુવારે ધરપકડ કરવામાં આવી હતી, જ્યારે તેના પિતા પણ આ કેસમાં આરોપી છે અને પોલીસ તેને શોધી રહી છે.
અમૃતા ફડણવીસે મલબાર હિલ પોલીસ સ્ટેશનમાં નોંધાવેલી ફરિયાદને આધારે ૨૦ ફેબ્રુઆરીએ ગુનો દાખલ કરવામાં આવ્યો હતો. આ કેસમાં ધરપકડ કરાયા બાદ અનિક્ષાને શુક્રવારે સેશન્સ જજ ડી.ડી. અલમાલે સમક્ષ હાજર કરાઇ હતી.
પોલીસ વતી હાજર ચીફ પબ્લિક પ્રોસિક્યુટર જયસિંહ દેસાઇએ જણાવ્યું હતું કે આ મામલો સાદો નથી અને તેમણે આરોપીની સાત દિવસની કસ્ટડીની માગણી કરી હતી. દરમિયાન કોર્ટે અનિક્ષાને ૨૧ માર્ચ સુધીની પોલીસ કસ્ટડી ફટકારી હતી.
એફઆઇઆર અનુસાર અનિક્ષા છેલ્લા ૧૬ મહિનાથી અમૃતાના સંપર્કમાં હતી અને તેના નિવાસે પણ ગઇ હતી. અમૃતાએ પોતાના નિવેદનમાં જણાવ્યું હતું કે તે નવેમ્બર, ૨૦૨૧માં અનિક્ષાને પહેલી વખત મળી હતી.
અનિક્ષાએ દાવો કર્યો હતો કે તે વસ્ત્રો, જ્વેલરી અને ફૂટવેરની ડિઝાઇનર છે અને તેણે વિનંતી કરી હતી કે તેના દ્વારા ડિઝાઇન કરાયેલાં વસ્ત્રો, જ્વેલરી અને ફૂટવેર પહેરીને અમૃતા જાહેર કાર્યક્રમોમાં હાજરી આપશે તો તેના વ્યવસાયને ફાયદો થશે, એમ મલબાર હિલ પોલીસ સ્ટેશનના અધિકારીએ જણાવ્યું હતું.
દરમિયાન અમૃતાનો વિશ્ર્વાસ સંપાદન કર્યા બાદ અનિક્ષાએ તેને કેટલાક બૂકીઓ વિશે માહિતી આપવાની ઓફર કરી હતી, જેના દ્વારા તેઓ પૈસા કમાઇ શકે છે, એવો દાવો તેણે કર્યો હતો. તેણે બાદમાં તેના પિતાને પોલીસ કેસમાંથી બહાર કાઢવા માટે અમૃતાને સીધી રૂ. એક કરોડની ઓફર કરી હતી.
અમૃતાએ પોલીસને જણાવ્યું હતું કે અનિક્ષાના વર્તનથી તે નારાજ હતી અને અનિક્ષાનો નંબર તેણે બ્લોક કરી દીધો હતો. અનિક્ષાએ ત્યાર બાદ અમૃતાને અજાણ્યા નંબર પરથી વીડિયો ક્લિપ્સ, વોઇસ નોટ્સ અને અનેક મેસેજ મોકલ્યા હતા.
અનિક્ષા અને તેના પિતાએ આડકતરી રીતે અમૃતાને ધમકી આપીને તેની વિરુદ્ધ કાવતરું ઘડ્યું હતું, એવો ફરિયાદમાં આક્ષેપ કરાયો હતો. (પીટીઆઇ)
