રિંકુ સિંહ અને નીતીશ રાણાએ અડધી સદી ફટકારીને KKRને ચેન્નાઈના ચેપોક સ્ટેડિયમ ખાતે ચેન્નાઈ સુપર કિંગ્સ સામે છ વિકેટથી નિર્ણાયક જીત અપાવી હતી. કોલકાતા નાઈટ રાઈડર્સના ઓલરાઉન્ડ ટીમ પ્રદર્શને ચેન્નાઈના ચેપોક સ્ટેડિયમ ખાતે ચેન્નાઈ સુપર કિંગ્સ સામે છ વિકેટથી નિર્ણાયક જીત નોંધાવવામાં મદદ કરી હતી અને તેમની પ્લેઓફની આશા જીવંત રાખી છે.

એમ એસ ધોનીએ પોતાની ટીમ માટે ટોસ જીતીને પ્રથમ બેટિંગ લેવાનું પસંદ કર્યું હતું. CSKએ 20 ઓવરમાં 6 વિકેટે 144 રન સાથે તેમની ઇનિંગ્સનો અંત કર્યો હતો. જીતવા માટે 145 રનના ટાર્ગેટને ચેસ કરવા ઉતરેલા કેકેઆર ને શરૂઆતમાં જ ઝટકો લાગ્યો હતો અને તેણે શરૂઆતમાં માત્ર 33 રનમાં તેની ત્રણ વિકેટ ગુમાવી દીધી હતી. ખરાબ શરૂઆત કર્યા બાદ, કેપ્ટન નીતીશ રાણા અને રિંકુ સિંઘે મહત્વપૂર્ણ ભાગીદારી રચી હતી. બંને બેટ્સમેનોએ અડધી સદી ફટકારી હતી અને ચોથી વિકેટ માટે 99 રનની ભાગીદારી નોંધાવી હતી, જે આઈપીએલના ઈતિહાસમાં ચેપોક ખાતે ચેન્નાઈ સામે ચોથી વિકેટની સૌથી વધુ રનની ભાગીદારી હતી.

રિંકુએ 43 બોલમાં 54 રન બનાવ્યા હતા, જેમાં ચાર બાઉન્ડ્રી અને ત્રણ સિક્સર હતી, જ્યારે રાણાએ 44 બોલમાં અણનમ 57 રન ફટકાર્યા હતા, જેમાં છ ચોગ્ગા અને એક સિક્સરનો સમાવેશ થાય છે. KKRએ છ વિકેટ અને નવ બોલ બાકી હતા ત્યારે જ 145 રનનો તેમનો લક્ષ્યાંક પૂરો કરી લીધો હતો. આ જીતનો અર્થ એ છે કે KKR 13 મેચમાંથી 12 પોઈન્ટ સાથે IPL 2023 પ્લેઓફમાં સ્થાન મેળવવાની રેસમાં છે. CSK માટે, પ્લેઓફ માટે ક્વોલિફાય થવાની તેમની તકને ફટકો પડ્યો છે, કારણ કે તેઓ હવે 13 મેચમાંથી 15 પોઈન્ટ સાથે ટેબલમાં બીજા સ્થાને છે. પ્લે ઓફમાં સ્થાન મેળવવા ચેન્નાઇને હવે આગામી મેચ જીતવી જરૂરી જ છે.