કસબાના કિંગમેકર સાંસદ ગિરીશ બાપટનું નિધન
પુણે લોકસભા મતવિસ્તારના ભાજપના સાંસદ તેમજ કિંગમેકર તરીકે જાણીતા વરિષ્ઠ નેતા ગિરીશ બાપટનું બુધવારે સવારે પુણેમાં નિધન થયું છે. તેઓ 72 વર્ષના હતા. તેમના પરિવારમાં પત્ની, પુત્ર, પુત્રવધૂ છે. ગિરીશ બાપટના પાર્થિવ દેહને અંતિમ દર્શન માટે તેમના શનિવાર પેઠ સ્થિત નિવાસસ્થાને રાખવામાં આવશે. ગિરીશ બાપટના પાર્થિવ દેહનો સાંજે સાત વાગ્યે વૈનકુઠ સ્મશાનગૃહમાં અંતિમ સંસ્કાર કરવામાં આવશે. ભાજપના પુણે શહેર પ્રમુખ જગદીશ મુલિકે ગિરીશ બાપટના નિધન અંગે મીડિયાને માહિતી આપી હતી. તેમણે કહ્યું કે આજે એક દુઃખદ ઘટના બની છે. ભાજપના લોકપ્રિય સાંસદ ગિરીશ બાપટ આજે આપણી વચ્ચે નથી. થોડા સમય પહેલા તેમનું નિધન થયું હતું. તેઓ છેલ્લા દોઢ વર્ષથી હોસ્પિટલમાં સારવાર લઈ રહ્યા હતા.
બાપટની પુણેની દીનાનાથ મંગેશકર હોસ્પિટલના ICU વોર્ડમાં સારવાર ચાલી રહી હતી. હાલ તેમની હાલત નાજુક હોવાથી તેમને વેન્ટિલેટર પર રાખવામાં આવ્યા હતા. તેમની રાજકીય કારકિર્દીમાં, ગિરીશ બાપટે સંઘ સ્વયંસેવક, મજૂર નેતા, કોર્પોરેટર, ધારાસભ્ય અને સાંસદ તરીકે વિવિધ જવાબદારીઓ નિભાવી હતી. ગિરીશ બાપટ પુણેના સ્થાનિક રાજકારણમાં પ્રભુત્વ ધરાવતા હતા. ગિરીશ બાપટ રાષ્ટ્રીય સ્વયંસેવક સંઘના સ્વયંસેવક હતા. તેમણે જનસંઘમાંથી રાજકારણમાં પ્રવેશ કર્યો હતો. કોર્પોરેટર તરીકે શરૂઆત કરીને ગિરીશ બાપટ 1995થી સતત પાંચ વખત ધારાસભ્ય તરીકે ચૂંટાયા હતા. 2019ની લોકસભા ચૂંટણીમાં તેઓ કોંગ્રેસના મોહન જોશીને હરાવીને લોકસભામાં પહોંચ્યા હતા. ગિરીશ બાપટના નિધનના સમાચાર મળતા જ ભાજપના ટોચના નેતાઓ ચંદ્રકાંત પાટીલ, દેવેન્દ્ર ફડણવીસ સાથે પુણે રવાના થઈ ગયા છે.
