મુંબઈ: ગત તા. નવમી ડિસેમ્બરના રોજ પૂરા થયેલા સપ્તાહ દરમિયાન ખાસ કરીને દેશની વિદેશી ચલણી અસ્ક્યામતોમાં વધારો થવાને કારણે કુલ વિદેશી હૂંડિયામણની અનામત ૨.૯૦૮ અબજ ડૉલર વધીને ૫૬૪.૦૬ અબજ ડૉલરની સપાટીએ રહી હોવાનું રિઝર્વ બૅન્ક ઑફ ઈન્ડિયાએ સાપ્તાહિક આંકડાકીય માહિતીમાં જણાવ્યું છે. આ પૂર્વેના સપ્તાહે અનામત ૧૧ અબજ ડૉલર વધીને ૫૬૧.૧૬ અબજ ડૉલરના સ્તરે રહી હતી. આમ સતત પાંચમાં સપ્તાહમાં દેશની વિદેશી હૂંડિયામણની અનામતમાં વધારો જોવા મળ્યો છે.
ઑક્ટોબર, ૨૦૨૧માં દેશની કુલ વિદેશી હૂંડિયામણની અનામત ૬૪૫ અબજ ડૉલરની ઐતિહાસિક ઊંચી સપાટીએ પહોંચી હતી. જોકે, ત્યાર બાદ વૈશ્ર્વિક પરિબળોને કારણે સ્થાનિક ફોરેક્સ માર્કેટમાં ડૉલર સામે રૂપિયામાં થઈ રહેલા સતત ધોવાણને અટકાવવા રિઝર્વ બૅન્ક ઑફ ઈન્ડિયા દ્વારા હાજર બજારમાં ડૉલરનું વેચાણ કરવામાં આવતા કુલ અનામતમાં ઘટાડો થઈ રહ્યો હતો. સમીક્ષા હેઠળના સપ્તાહમાં દેશની કુલ અનામત પૈકી મુખ્ય હિસ્સો ધરાવતી વિદેશી ચલણી અસ્ક્યામતો ૩.૧૪૧ અબજ ડૉલર વધીને ૫૦૦.૧૨૫ અબજ ડૉલરની સપાટીએ રહી હતી. જોકે, વિદેશી ચલણી અસ્ક્યામતોમાં ડૉલર ઉપરાંત યુરો, પાઉન્ડ અને યેન જેવાં ચલણો સામે સમીક્ષા હેઠળના સપ્તાહમાં રૂપિયામાં થયેલી વધઘટને પણ ધ્યાનમાં લેવામાં આવતી હોય છે.
વધુમાં ગત નવમી ડિસેમ્બરના રોજ પૂરા થયેલા સપ્તાહમાં ઈન્ટરનેશનલ મોનેટરી ફંડ સાથેના સ્પેશિયલ ડ્રોઈંગ રાઈટ્સ ૬.૧ કરોડ ડૉલર વધીને ૧૮૧૮.૧૦૬ અબજ ડૉલર અને ઈન્ટરનેશનલ મોનેટરી ફંડ સાથેની અનામત પણ ૨૦ લાખ ડૉલર વધીને ૫.૧૧ અબજ ડૉલરની સપાટીએ રહી હતી. જોકે, સપ્તાહ દરમિયાન સોનાની અનામત ૨૯.૬ કરોડ ડૉલર ઘટીને ૪૦.૭૨૯ અબજ ડૉલરની સપાટીએ રહી હોવાનું રિઝર્વ બૅન્કે યાદીમાં ઉમેર્યું હતું.