(વાણિજ્ય પ્રતિનિધિ તરફથી)

મુંબઈ: અમેરિકાની આર્થિક વૃદ્ધિની ચિંતાને ધ્યાનમાં લેતાં આજે લંડન ખાતે સત્રના આરંભે સોનામાં રોકાણકારોની સલામતી માટેની માગને ટેકે ભાવમાં સુધારાતરફી વલણ રહ્યું હોવાના નિર્દેશ છતાં સ્થાનિક ઝવેરી બજારમાં બન્ને કિંમતી ધાતુઓમાં સાર્વત્રિક સ્તરેથી માગ નિરસ રહેતાં સોનાના ભાવમાં ૧૦ ગ્રામદીઠ રૂ. ૧૦૨થી ૧૦૩ અને ચાંદીના ભાવમાં કિલોદીઠ રૂ. ૪૮નો ઘસરકો આવ્યો હતો. જોકે, આજે આ અહેવાલ લખાઈ રહ્યો છે ત્યારે સ્થાનિક ફોરેક્સ માર્કેટમાં ડૉલર સામે રૂપિયો બેતરફી વધઘટે અથડાઈ ગયો હોવાથી ખાસ કરીને સોનાના ભાવ પર રૂપિયાની વધઘટની કોઈ અસર નહોતી જોવા મળી.

સ્થાનિક સોનાચાંદી બજારમાં આજે મધ્યસત્ર દરમિયાન .૯૯૯ ટચ ચાંદીમાં સ્ટોકિસ્ટોની છૂટીછવાઈ વેચવાલીના દબાણ સામે ઔદ્યોગિક વપરાશકારો અને જ્વેલરી ઉત્પાદકોની માગ ખપપૂરતી મર્યાદિત રહેતાં ભાવ કિલોદીઠ રૂ. ૪૮ના ઘટાડા સાથે રૂ. ૭૬,૩૫૧ના મથાળે રહ્યા હતા. વધુમાં આજે સોનામાં પણ અમેરિકાના ફુગાવાના ડેટાની જાહેરાત પૂર્વે રોકાણકારોએ સાવચેતીનો અભિગમ અપનાવતાં લેવાલી નિરસ રહી હતી. તેમ જ જ્વેલરી ઉત્પાદકો તથા રિટેલ સ્તરની લેવાલી પાંખી રહેતાં મધ્યસત્ર દરમિયાન ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૧૦૨ ઘટીને રૂ. ૬૧,૧૮૫ અને ૯૯.૯ ટચ સ્ટાન્ડર્ડ સોનાના રૂ. ૧૦૩ ઘટીને રૂ. ૬૧,૪૩૦ના મથાળે રહ્યા હતા.

આજે ચીનના ટ્રેડ ડેટા નબળા આવ્યાના નિર્દેશો ઉપરાંત અમેરિકાની આર્થિક વૃદ્ધિની ચિંતા હેઠળ વૈશ્ર્વિક ઈક્વિટી માર્કેટમાં નરમાઈનું વલણ રહ્યું હોવાથી લંડન ખાતે સત્રના આરંભે હાજરમાં સોનાના ભાવ ગઈકાલના બંધ સામે ૦.૮ ટકા વધીને ઔંસદીઠ ૨૦૩૬.૫૬ ડૉલર અને વાયદામાં ભાવ ૦.૫ ટકા વધીને ૨૦૪૨.૯૦ ડૉલર આસપાસ ક્વૉટ થઈ રહ્યા હતા. જોકે, આજે મોડી સાંજે અમેરિકાના ફુગાવાના ડેટાની જાહેરાત પર રોકાણકારોની નજર હોવાથી રોકાણકારોએ સોનામાં નવી લેવાલીમાં સાવચેતીનું વલણ અપનાવ્યું હોવાથી સોનામાં સુધારો મર્યાદિત રહ્યો હતો. તેમ જ આજે સત્રના આરંભે હાજરમાં ચાંદીના ભાવ ગઈકાલના બંધ સામે ૦.૪ ટકા વધીને ઔંસદીઠ ૨૫.૬૬ ડૉલર આસપાસ ક્વૉટ થઈ રહ્યા હતા.

આજે મોડી સાંજે જાહેર થનારા ફુગાવામાં જો અનપેક્ષિત વધારો જોવા મળે તો અમેરિકી ફેડરલ રિઝર્વ આગામી જૂન મહિનાની બેઠકમાં વ્યાજદરમાં વધારો કરશે અને જો વ્યાજદર વધવાની શક્યતા પ્રબળ બને તો સોનાના ભાવ દબાણ હેઠળ આવી શકે છે અને જો ફુગાવો દબાણ હેઠળ આવશે તો સોનામાં સુધારાતરફી વલણ જોવા મળે તેવી શક્યતા વિશ્ર્લેષકો વ્યક્ત કરી રહ્યા છે. જોકે, અમેરિકાની આર્થિક વૃદ્ધિની ચિંતા, બૅન્કોની કથળેલી સ્થિતિ અને દેવાની ટોચની મર્યાદાને ધ્યાનમાં લેતાં એકંદરે સોનામાં સલામતી માટેની માગનો ટેકો મળતો રહે તેવું બજાર વર્તુળોનું મંતવ્ય છે.