(વાણિજ્ય પ્રતિનિધિ તરફથી)
મુંબઈ: વૈશ્વિક વિનિમય બજારમાં આજે ડૉલર ઈન્ડેક્સમાં નરમાઈનું વલણ રહેતાં સોના-ચાંદીના ભાવમાં ધીમો સુધારો આગળ વધ્યો હતો. જોકે, સ્થાનિક ઝવેરી બજારમાં ગઈકાલે બન્ને કીંમતી ધાતુઓના ભાવમાં ઉછાળો આવ્યા બાદ આજે મધ્યસત્ર દરમિયાન નફારૂપી વેચવાલીનું દબાણ અને ઊંચા મથાળેથી માગ રૂંધાઈ જવાથી સોનાના ભાવમાં ૧૦ ગ્રામદીઠ રૂ. ૬૮નો ઘટાડો આવ્યો હતો. જોકે, આજે આ અહેવાલ લખાઈ રહ્યો છે ત્યારે સ્થાનિક ફોરેક્સ માર્કેટમાં ડૉલર સામે રૂપિયામાં ૧૫ પૈસાનો ઘટાડો દર્શાવાઈ રહ્યો હોવાથી સ્થાનિકમાં સોનાની આયાત પડતર વધવાને કારણે ભાવઘટાડો મર્યાદિત રહ્યો હોવાનું સૂત્રોએ જણાવ્યું હતું, જ્યારે અને ચાંદીના ભાવમાં કિલોદીઠ રૂ. ૪૫૪નો ઘટાડો આવ્યો હતો.
બજારનાં સાધનોના જણાવ્યાનુસાર આજે મધ્યસત્ર દરમિયાન .૯૯૯ ટચ ચાંદીમાં સ્ટોકિસ્ટોની ઊંચા મથાળેથી નફારૂપી વેચવાલીનું દબાણ તેમ જ ઔદ્યોગિક વપરાશકારો તથા જ્વેલરી ઉત્પાદકોની લેવાલી ખપપૂરતી રહેતાં ભાવ કિલોદીઠ રૂ. ૪૫૪ના ઘટાડા સાથે રૂ. ૬૬,૪૪૪ના મથાળે રહ્યા હતા. વધુમાં સોનામાં પણ સ્ટોકિસ્ટોની વેચવાલી સામે નવી લેવાલીનો અભાવ તેમ જ ઊંચા મથાળેથી જ્વેલરી ઉત્પાદકો અને રિટેલ સ્તરની માગ પણ ખપપૂરતી રહેતાં મધ્યસત્ર દરમિયાન ભાવ ૧૦ ગ્રામદીઠ રૂ. ૬૮ના ઘટાડા સાથે ૯૯.૫ ટચ સ્ટાન્ડર્ડ સોનાના રૂ. ૫૩,૯૬૩ અને ૯૯.૯ ટચ સ્ટાન્ડર્ડ સોનાના રૂ. ૫૪,૧૮૦ના મથાળે રહ્યા હતા.
દરમિયાન આજે વૈશ્ર્વિક વિનિમય બજારમાં ડૉલર ઈન્ડેક્સમાં નરમાઈ રહેતાં લંડન ખાતે સત્રના આરંભે હાજરમાં સોનાના ઔંસદીઠ ભાવ ગઈકાલના બંધથી ૦.૩ ટકા વધીને ૧૭૯૧.૯૧ ડૉલર અને વાયદામાં ભાવ ૦.૧ ટકા વધીને ઔંસદીઠ ૧૮૦૦.૨૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ઔંસદીઠ ભાવ ગઈકાલના બંધથી ૦.૪ ટકા વધીને ૨૩.૦૪ ડૉલર આસપાસ ક્વૉટ થઈ રહ્યા હતા.
આજે બૅન્ક ઑફ જાપાને આશ્ર્ચર્યજનક નિયંત્રાત્મક નીતિની સમીક્ષા કરવાનું જણાવતાં ડૉલર ઈન્ડેક્સમાં વધ્યા મથાળેથી ઘટાડો આવતા સોનામાં સુધારાતરફી વલણ જોવા મળ્યું હતું. જોકે, આગામી વર્ષ ૨૦૨૩માં ફેડરલ રિઝર્વ વ્યાજદરમાં વધારાનું વલણ જાળવી રાખશે તેમ જ યુરોપિયન સેન્ટ્રલ બૅન્કે પણ વ્યાજદરમાં વધારો જળવાઈ રહેવાનો સંકેત આપ્યો હોવાથી આગામી વર્ષે પણ સોનામાં મોટી તેજીની શક્યતા ન હોવાનું વિશ્ર્લેષકો જણાવી રહ્યા છે.
