મુંબઈ: આંતરરાષ્ટ્રીય સ્તરે ડૉલર ઈન્ડેક્સમાં નરમાઈ તેમ જ પ્રવર્તમાન બૅન્કિંગ ક્ષેત્રની કટોકટીને ધ્યાનમાં લેતાં સોનામાં સલામતી માટેની માગ જળવાઈ રહેતાં આજે લંડન ખાતે સત્રના આરંભે સોનાના ભાવ ૦.૬ ટકા અને ચાંદીના ભાવ ૦૪ ટકા વધીને ક્વૉટ થઈ રહ્યા હતા. જોકે, સ્થાનિક ફોરેક્સ માર્કેટમાં આજે ડૉલર સામે રૂપિયો ગઈકાલના બંધથી ૧૭ પૈસાના સુધારા સાથે બંધ રહ્યો હોવાથી સ્થાનિકમાં સોનાની આયાત પડતરમાં ઘટાડો થવાને કારણે હાજરમાં સોનાના ભાવમાં વધ્યા મથાળેથી ૧૦ ગ્રામદીઠ રૂ. ૧૨૦થી ૧૨૧નો અને ચાંદીના ભાવમાં કિલોદીઠ રૂ. ૫૩૮નો ઘટાડો આવ્યો હતો. આજે સ્થાનિકમાં ખાસ કરીને રૂપિયામાં ઘટ્યા મથાળેથી સુધારો આવતા સોનાની આયાત પડતરમાં ઘટાડો અને ઊંચા મથાળેથી જ્વેલરી ઉત્પાદકો તથા રિટેલ સ્તરની માગ છૂટીછવાઈ ખપપૂરતી રહેતાં હાજરમાં ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૧૨૦ ઘટીને રૂ. ૫૭,૯૮૭ અને ૯૯.૯ ટચ સ્ટાન્ડર્ડ સોનાના રૂ. ૧૨૧ ઘટીને રૂ. ૫૮,૨૨૦ના મથાળે રહ્યા હતા. જોકે, આજે સોનામાં રોકાણકારો અને સ્ટોકિસ્ટોની વૈશ્ર્વિક પ્રોત્સાહક અહેવાલે છૂટીછવાઈ માગ રહી હોવાનું સૂત્રોએ જણાવ્યું હતું. વધુમાં આજે હાજરમાં .૯૯૯ ટચ ચાંદીમાં સ્ટોકિસ્ટોની ઊંચા મથાળેથી નફારૂપી વેચવાલીનું દબાણ અને ઔદ્યોગિક વપરાશકારોની લેવાલી ખપપૂરતી રહેતાં ભાવ કિલોદીઠ રૂ. ૫૩૮ના ઘટાડા સાથે રૂ. ૬૬,૭૭૩ના મથાળે રહ્યા હતા.
વૈશ્ર્વિક સ્તરે પ્રવર્તમાન બૅન્કિંગ ક્ષેત્રની કટોકટી, ફેડરલનાં વ્યાજદરમાં વધારાની અનિશ્ર્ચિતતા અને વધતા ફુગાવાની ચિંતાને ધ્યાનમાં લેતા આજે લંડન ખાતે સત્રના આરંભે સોનામાં રોકાણકારોની સલામતી માટેની માગ જળવાઈ રહેતાં હાજર અને વાયદામાં ભાવ ગઈકાલના બંધથી ૦.૬ ટકા વધીને ઔંસદીઠ ૧૯૩૧.૧૨ ડૉલર અને વાયદામાં ભાવ ગઈકાલના બંધથી ૦.૭ ટકા વધીને ૧૯૩૫.૮૦ ડૉલર આસપાસ ક્વૉટ થઈ રહ્યા હતા. અત્રે નોંધનીય બાબત એ છે કે આ સપ્તાહમાં અત્યાર સુધીમાં સોનાના ભાવમાં ગત નવેમ્બરના મધ્ય પછીનો સૌથી વધુ ૩.૫ ટકાનો સાપ્તાહિક ધોરણે ઉછાળો જોવા
મળ્યો છે.
વધુમાં આજે સત્રના આરંભે હાજરમાં ચાંદીના ભાવ ગઈકાલના બંધથી ૦.૪ ટકા વધીને ઔંસદીઠ ૨૧.૮૦ ડૉલર આસપાસ ક્વૉટ થઈ રહ્યા હતા. તાજેતરમાં સોનાની તેજીને બૅન્કિંગ ક્ષેત્રની કટોકટીનો લાભ મળી રહ્યો છે. તેમ જ આ કટોકટીને કારણે સંભવત: ફેડરલ રિઝર્વ વ્યાજદરમાં વધારો ૨૫ બેસિસ પૉઈન્ટ સુધી સીમિત રાખે તેવો આશાવાદ સેવાઈ રહ્યો છે. જોકે, ગઈકાલે યુરોપિયન સેન્ટ્રલ બૅન્કે વધતા ફુગાવાને ડામવા માટે વ્યાજદરમાં ૫૦ બેસિસ પૉઈન્ટનો વધારો કર્યો હતો.
આમ એકંદરે વર્તમાન સ્થિતિને ધ્યાનમાં લેતાં વિશ્ર્લેષકો આગામી ટૂંકા સમયગાળામાં સોના માટે ઔંસદીઠ ૧૯૧૭ ડૉલરની સપાટી મહત્ત્વની ટેકાની સપાટી પુરવાર થાય તેવી શક્યતા વ્યક્ત કરતા જણાવે છે કે જો આ સપાટી તૂટે તો ભાવ ઘટીને ઔંસદીઠ ૧૯૦૫થી ૧૯૧૭ની રેન્જમાં અથડાતા રહેશે. ઉ