ચાંદીમાં વન વે તેજી: ભાવ રૂ. ૭૮૭ વધીને રૂ. ૭૭,૦૦૦ની પાર, સોનામાં રૂ. ૯૩નો સુધારો
(વાણિજ્ય પ્રતિનિધિ તરફથી)
મુંબઈ: અમેરિકા ખાતે બૅન્કોની સ્થિતિ વણસવાની સાથે ફેડરલ રિઝર્વે નાણાનીતિ હળવી કરવાના સંકેતો આપતાં ગઈકાલે ન્યૂ યોર્ક મર્કન્ટાઈલ એક્સચેન્જ ખાતે સોનામાં રોકાણકારોની સલામતી માટેની માગને ટેકે હાજરમાં એક તબક્કે સોનાના ભાવ વધીને વર્ષ ૨૦૨૦ની ઔંસદીઠ ૨૦૭૨.૪૯ની ઊંચી સપાટીથી સહેજ નીચે ૨૦૭૨.૧૯ ડૉલર સુધી પહોંચ્યા બાદ પીછેહઠ જોવા મળી હતી. જોકે, આજે લંડન ખાતે ભાવ સાંકડી વધઘટે ટકેલા રહ્યા હતા અને વાયદામાં ૦.૧ ટકાનો સુધારો આવ્યો હતો તેમ જ ચાંદીના ભાવમાં સાધારણ પીછેહઠ જોવા મળી હતી. જોકે, સ્થાનિક ઝવેરી બજારમાં આજે મધ્યસત્ર દરમિયાન વૈશ્વિક ઓવરનાઈટ પ્રોત્સાહક અહેવાલે સોનાના ભાવમાં ૧૦ ગ્રામદીઠ રૂ. ૯૨થી ૯૩નો સુધારો આવ્યો હતો, જ્યારે ચાંદીમાં સટ્ટાકીય આકર્ષણ વધુ રહેતાં ભાવ કિલોદીઠ રૂ. ૭૮૭ની તેજી સાથે રૂ. ૭૭,૦૦૦ની સપાટી કુદાવી ગયા હતા.
એકંદરે વર્ષ ૨૦૨૩ના પહેલા ત્રિમાસિકગાળા દરમિયાન વિશ્વ બજાર પાછળ સ્થાનિકમાં સોનાની ભાવસપાટી ઊંચી રહી હોવાથી દેશની સોનાની માગમાં વર્ષ ૨૦૨૨ના પહેલા ત્રિમાસિકગાળાની તુલનામાં ૧૭ ટકા ઘટીને છેલ્લા ૧૦ ત્રિમાસિકગાળાની નીચી સપાટીએ રહી હોવાનું આજે વર્લ્ડ ગોલ્ડ કાઉન્સિલે જાહેર કરેલી વર્ષ ૨૦૨૩ના પહેલા ત્રિમાસિકગાળાની એક આંકડાકીય માહિતીમાં જણાવ્યું હતું તેમ જ જૂન તથા સપ્ટેમ્બર અંતના ત્રિમાસિકગાળામાં પણ માગ ઓછી જ રહે તેવી શક્યતા અહેવાલમાં વ્યક્ત કરવામાં આવી છે.
કાઉન્સિલના જણાવ્યાનુસાર પહેલા ત્રિમાસિકગાળામાં માર્ચના અંતે જ્વેલરી અને રોકાણલક્ષી માગ ઘટીને ૧૧૨.૫ ટનના સ્તરે રહી હતી, જ્યારે જૂના સોનાનો પુરવઠો ૨૫ ટકા વધીને ૩૪.૮ ટનના સ્તરે રહ્યો હતો. દરમિયાન આજે સ્થાનિકમાં મધ્યસત્ર દરમિયાન વૈશ્વિક ઓવરનાઈટ પ્રોત્સાહક અહેવાલે મુખ્યત્વે .૯૯૯ ટચ ચાંદીમાં સ્ટોકિસ્ટોની આક્રમક સટ્ટાકીય લેવાલી ઉપરાંત ઔદ્યોગિક વપરાશકારો તથા જ્વેલરી ઉત્પાદકોની માગને ટેકે ભાવ કિલોદીઠ રૂ. ૭૮૭ વધીને રૂ. ૭૭,૨૫૧ના મથાળે રહ્યા હતા. જોકે, આજે સોનામાં ઊંચા મથાળેથી સ્ટોકિસ્ટો, રોકાણકારો અને જ્વેલરી ઉત્પાદકોની નિરસ માગ અને રિટેલ સ્તરની લેવાલી છૂટીછવાઈ રહી હોવા છતાં વૈશ્વિક પ્રોત્સાહક અહેવાલે ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૯૨ વધીને રૂ. ૬૧,૪૯૨ અને ૯૯.૯ ટચ સ્ટાન્ડર્ડ સોનાના રૂ. ૯૩ વધીને રૂ. ૬૧,૭૩૯ના મથાળે રહ્યા હતા.
બૅન્કોની સ્થિતિ કથળતા આર્થિક વૃદ્ધિની ચિંતા સપાટી પર રહેતાં ફેડરલ રિઝર્વ વ્યાજદરમાં ઘટાડાની શરૂઆત કરે તેવા આશાવાદ સાથે ગઈકાલે ન્યૂ યોર્ક ખાતે સોનાના ભાવમાં ઉછાળો આવ્યા બાદ આજે લંડન ખાતે સત્રના આરંભે હાજરમાં ભાવ ગઈકાલના બંધ આસપાસ ઔંસદીઠ ૨૦૫૦.૬૩ ડૉલર અને વાયદામાં ભાવ ગઈકાલના બંધ સામે ૦.૧ ટકા વધીને ૨૦૫૮.૫૦ ડૉલર આસપાસ ક્વૉટ થઈ રહ્યા હતા. જોકે, આજે રોકાણકારોની નજર મોડી સાંજે જાહેર થનારા નોન ફાર્મ પેરૉલ ડેટા પર સ્થિર હોવાથી તેઓની લેવાલી પાંખી રહી હતી. તેમ જ આજે ચાંદીના ભાવ વધ્યા મથાળેથી ૦.૨ ટકા ઘટીને ઔંસદીઠ ૨૬.૦૩ ડૉલર આસપાસ ક્વૉટ થઈ રહ્યા હતા.
