Homeદેશ વિદેશચાંદીમાં વધ્યા મથાળેથી રૂ. ૫૧૬ તૂટ્યા, સોનામાં રૂ. એકનો ઘસરકો

ચાંદીમાં વધ્યા મથાળેથી રૂ. ૫૧૬ તૂટ્યા, સોનામાં રૂ. એકનો ઘસરકો

(વાણિજ્ય પ્રતિનિધિ તરફથી)

મુંબઈ: આજે લંડન ખાતે સત્રના આરંભે ખાસ કરીને ડૉલર ઈન્ડેક્સમાં નરમાઈતરફી વલણ રહેતા સોનામાં ઘટ્યા મથાળેથી સાધારણ સુધારો આવ્યો હોવાના અહેવાલ છતાં સ્થાનિક ઝવેરી બજારમાં સત્રના આરંભે ખાસ કરીને સોનામાં નિરસ માગ રહેતાં ભાવમાં સાધાણ ૧૦ ગ્રામદીઠ રૂ. એકનો ઘસરકો આવ્યો હતો. જોકે, આજે સ્થાનિક ફોરેક્સ માર્કેટમાં ડૉલર સામે રૂપિયો ૧૭ પૈસા નબળો પડ્યો હોવા છતાં સોનાના ભાવ પર કોઈ નોંધપાત્ર અસર નહોતી જોવા મળી, જ્યારે ચાંદીમાં વધ્યા મથાળેથી સ્ટોકિસ્ટોની આક્રમક નફારૂપી વેચવાલી તેમ જ ઔદ્યોગિક વપરાશકારો તથા જ્વેલરી ઉત્પાદકોની માગ નિરસ રહેતાં ભાવમાં કિલોદીઠ રૂ. ૫૧૬નો ઘટાડો આવ્યો હતો.
બજારનાં સાધનોના જણાવ્યાનુસાર ગઈકાલે સ્થાનિકમાં .૯૯૯ ટચ ચાંદીમાં કિલોદીઠ રૂ. ૧૬૯૮નો ઉછાળો આવ્યા બાદ આજે મધ્યસત્ર દરમિયાન સ્ટોકિસ્ટોની નફારૂપી વેચવાલીનું દબાણ અને ઔદ્યોગિક વપરાશકારો તથા જ્વેલરી ઉત્પાદકોની માગ નિરસ રહેતાં ભાવ કિલોદીઠ રૂ. ૫૧૬ના ઘટાડા સાથે રૂ. ૫૮,૫૩૨ના મથાળે રહ્યા હતા. વધુમાં આજે સોનામાં પણ મધ્યસત્ર દરમિયાન સ્ટોકિસ્ટો અને રોકાણકારોની નવી લેવાલીનો અભાવ ઉપરાંત જ્વેલરી ઉત્પાદકો તથા રિટેલ સ્તરની માગ ખપપૂરતી રહેતાં ભાવ ૧૦ ગ્રામદીઠ સાધારણ રૂ. એકના ઘસરકા સાથે ૯૯.૫ ટચ સ્ટાન્ડર્ડ સોનાના રૂ. ૫૦,૪૮૭ અને ૯૯.૯ ટચ સ્ટાન્ડર્ડ સોનાના રૂ. ૫૦,૬૯૦ના મથાળે રહ્યા હતા.
આજે સમાપન થનારી અમેરિકી ફેડરલ રિઝર્વની નીતિવિષયક બેઠકની ફળશ્રુતિમાં ફેડરલના અધ્યક્ષ વ્યાજદરમાં આગામી વધારા અંગે કેવા દિશાનિર્દેશ આપે છે તેની અવઢવ વચ્ચે ડૉલર ઈન્ડેક્સમા ૦.૩ ટકા જેટલી નરમાઈનુ વલણ રહેતાં લંડન ખાતે સત્રના આરંભે હાજરમાં સોનાના ભાવ ગઈકાલના બંધથી સાધારણ ૦.૨ ટકાના સુધારા સાથે ઔંસદીઠ ૧૬૫૦.૪૯ ડૉલર અને વાયદામાં ભાવ ૦.૩ ટકા વધીને ૧૬૫૫.૩૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ સાંકડી વધઘટે અથડાઈને ત્રણ સપ્તાહની ઊંચી ઔંસદીઠ ૧૯.૬૪ ડૉલર આસપાસની સપાટીએ ટકેલા રહ્યા હતા. અત્રે ઉલ્લેખનીય બાબત એ છે કે સોલાર એનર્જી અને ઈલેક્ટ્રિક વાહનોમાં ચાંદીમાં ઉપયોગ થઈ રહ્યો હોવાથી માગ પ્રબળ રહે છે. વધુમાં ચીન ખાતે કોવિડ-૧૯ને લગતા નિયંત્રણો હળવા થવાના આશાવાદને ધ્યાનમાં લેતાં પણ ચાંદીમાં માગ વધી રહી હોવાનું વિશ્ર્લેષકો જણાવે છે.
આજે ફેડરલ રિઝર્વ બેઠકના અંતે વ્યાજદરમાં ૭૫ બેઝિસ પૉઈન્ટનો વધારો કરશે અને આગામી ડિસેમ્બર મહિનાની બેઠકમાં ૫૦ બેઝિસ પૉઈન્ટનો વધારો કરે તેવી શક્યતા બજાર વર્તુળો વયક્ત કરી રહ્યા છે.

RELATED ARTICLES

Latest Post

- Advertisment -

Most Popular

- Advertisment -