(વાણિજ્ય પ્રતિનિધિ તરફથી)
મુંબઈ: વૈશ્ર્વિક બજારમાં આજે ક્રૂડતેલના ભાવમાં ઘટાડો, ડૉલર ઈન્ડેક્સમાં નરમાઈ, સ્થાનિક ઈક્વિટી માર્કેટમાં સુધારાતરફી વલણ ઉપરાંત ગત શુક્રવારે વિદેશી સંસ્થાકીય રોકાણકારોની ઈક્વિટીમાં લેવાલી જળવાઈ રહી હોવાના નિર્દેશો સાથે સ્થાનિક ફોરેક્સ માર્કેટમાં આજે ડૉલર સામે રૂપિયો સાધારણ ત્રણ પૈસાના સુધારા સાથે ૮૧.૬૮ના મથાળે રહ્યો હતો.
બજારનાં સાધનોના જણાવ્યાનુસાર આજે સ્થાનિક ફોરેક્સ માર્કેટમાં ડૉલર સામે રૂપિયો ગત શુક્રવારના ૮૧.૭૧ના બંધ સામે નરમાઈના ટોને ૮૧.૮૧ની સપાટીએ ખૂલ્યા બાદ સત્ર દરમિયાન નીચામાં ૮૧.૮૩ અને ઉપરમાં ૮૧.૬૧ સુધી મજબૂત થયા બાદ અંતે આગલા બંધથી ત્રણ પૈસા વધીને ૮૧.૭૧ના મથાળે બંધ રહ્યો હતો.
દરમિયાન આજે વિશ્ર્વ બજારમાં સત્રના આરંભે ડૉલર ઈન્ડેક્સમાં મજબૂત વલણ રહ્યા બાદ આગલા બંધથી સાધારણ ૦.૩૫ ટકાના ઘટાડા સાથે ૧૦૫.૫૯ આસપાસ ક્વૉટ થઈ રહ્યો હતો, જ્યારે વિશ્ર્વ બજારમાં બ્રેન્ટ ક્રૂડતેલના વાયદામાં ભાવ આગલા બંધથી ૩.૧૦ ટકાના ઘટાડા સાથે બેરલદીઠ ૮૧.૦૪ ડૉલર આસપાસ ક્વૉટ થઈ રહ્યા હતા. આ ઉપરાંત આજે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સમાં ૨૧૧.૧૬ પૉઈન્ટનો અને એનએસઈ બૅન્ચમાર્ક નિફ્ટીમાં ૫૦ પૉઈન્ટનો સુધારો આવ્યો હતો. તેમ જ ગત શુક્રવારે વિદેશી સંસ્થાકીય રોકાણકારોની ઈક્વિટીમાં રૂ. ૩૬૯.૦૮ કરોડની ચોખ્ખી લેવાલી રહી હોવાના નિર્દેશને કારણે રૂપિયાના સુધારાને ટેકો મળ્યો હતો. અત્રે ઉલ્લેખનીય બાબત એ છે કે વર્તમાન નવેમ્બર મહિનામાં અત્યાર સુધીમાં સ્થાનિક ઈક્વિટી માર્કેટમાં રૂ. ૩૧,૬૩૦ કરોડની વિદેશી સંસ્થાકીય રોકાણકારોની ચોખ્ખી લેવાલી રહી છે.