(વાણિજ્ય પ્રતિનિધિ તરફથી)
મુંબઈ: ગઈકાલે ન્યૂ યોર્ક મર્કન્ટાઈલ એક્સચેન્જ ખાતે સોનાના ભાવમાં સુધારાતરફી વલણ રહ્યા બાદ આજે આંતરરાષ્ટ્રીય વિનિમય બજારમાં ડૉલર ઈન્ડેક્સમાં સાધારણ નરમાઈનું વલણ રહ્યું હોવા છતાં વર્ષ ૨૦૨૨ના અંતિમ સત્રમાં લંડન ખાતે સત્રના આરંભે હાજરમાં સોનાના ભાવ સાંકડી વધઘટે અથડાઈને મક્કમ રહ્યા હોવાના નિર્દેશ સાથે સ્થાનિક ઝવેરી બજારમાં પણ સોનાના ભાવમાં ૧૦ ગ્રામદીઠ રૂ. ૨૧૫થી ૨૧૬નો સુધારો આગળ ધપ્યો હતો. જોકે, આજે સ્થાનિક ફોરેક્સ માર્કેટમાં ડૉલર સામે રૂપિયામાં ૧૫ પૈસાનો સુધારો આવ્યો હોવાથી સોનાની આયાત પડતરમાં ઘટાડો થતાં વિશ્વ બજારની સરખામણીમાં ભાવવધારો મર્યાદિત રહ્યો હતો. વધુમાં આજે .૯૯૯ ટચ ચાંદીમાં પણ વિશ્વ બજાર પાછળ સ્ટોકિસ્ટોની લેવાલી નીકળતાં ભાવમાં કિલોદીઠ રૂ. ૨૫નો સુધારો આવ્યો હતો.
બજારનાં સાધનોના જણાવ્યાનુસાર આજે સ્થાનિક સોના-ચાંદી બજારમાં ખાસ કરીને લંડનના પ્રોત્સાહક અહેવાલે .૯૯૯ ટચ ચાંદીમાં સ્ટોકિસ્ટોની આક્રમક સટ્ટાકીય લેવાલી ઉપરાંત ઔદ્યોગિક વપરાશકારો અને જ્વેલરી ઉત્પાદકોની માગને ટેકે ભાવ કિલોદીઠ રૂ. ૨૫૨ના સુધારા સાથે ફરી રૂ. ૬૮,૦૦૦ની સપાટી કુદાવીને રૂ. ૬૮,૦૯૨ના મથાળે રહ્યા હતા. તે જ પ્રમાણે સોનામાં પણ વૈશ્ર્વિક પ્રોત્સાહક અહેવાલ અને સ્ટોકિસ્ટો અને રોકાણકારોની છૂટીછવાઈ લેવાલીને ટેકે ૯૯.૫ ટચ સ્ટાન્ડર્ડ સોનાના ભાવ ૧૦ ગ્રામદીઠ રૂ. ૨૧૫ વધીને રૂ. ૫૪,૬૪૭ અને ૯૯.૯ ટચ સ્ટાન્ડર્ડ સોનાના રૂ. ૨૧૬ વધીને રૂ. ૫૪,૮૬૭ના મથાળે રહ્યા હતા. જોકે, આજે ઊંચા મથાળેથી સોનામાં જ્વેલરી ઉત્પાદકો અને રિટેલ સ્તરની લેવાલી નિરસ રહી હોવાનું સૂત્રોએ જણાવ્યું હતું.
દરમિયાન આજે લંડન ખાતે હાજરમાં સોનાના ભાવ ગઈકાલના બંધ આસપાસ ઔંસદીઠ ૧૮૧૬.૦૫ ડૉલર અને વાયદામાં ભાવ ગઈકાલના બંધથી ૦.૩ ટકા ઘટીને ૧૮૨૧.૩૦ ડૉલર આસપાસ ક્વૉટ થઈ રહ્યા હતા, જ્યારે હાજરમાં ચાંદીના ભાવ ગઈકાલના બંધથી ૦.૧ ટકા વધીને ઔંસદીઠ ૨૩.૯૦ ડૉલર આસપાસ ક્વૉટ થઈ રહ્યા હતા.
વર્ષ ૨૦૨૨માં અમેરિકી ફેડરલ રિઝર્વ દ્વારા વ્યાજદરમાં વધારો, ડૉલર ઈન્ડેક્સમાં મજબૂત વલણ અને અમેરિકી ટ્રેઝરીની યિલ્ડ ઊંચી સપાટીએ રહેતાં આ વર્ષમાં અત્યાર સુધી સોનાના ભાવમાં વાર્ષિક ધોરણે ૦.૫ ટકા સુધીનો ઘટાડો થયો છે. વધુમાં વર્ષ ૨૦૨૩ દરમિયાન પણ ડૉલર ઈન્ડેક્સ તથા ટ્રેઝરીની યિલ્ડની વધઘટને ધ્યાનમાં સોનાના ભાવમાં વધઘટ સાથે ચંચળતા જોવા મળે તેવી શક્યતા વ્યક્ત કરતાં એક વિશ્લેષકે જણાવતાં ઉમેર્યું હતું કે જો વર્ષ ૨૦૨૩માં આર્થિક મંદી જોવા મળશે તો ચાંદી, પ્લેટિનમ અને પેલેડિયમ જેવી ધાતુના ભાવ વધુ દબાણ હેઠળ આવે તેવી શક્યતા નકારી ન શકાય.