સિદ્ધાર્થ મલ્હોત્રા અને કિયારા અડવાણીના લગ્નના સમાચારો વચ્ચે એવા અહેવાલો સામે આવી રહ્યા છે કે અજય દેવગણની ફિલ્મ ‘દ્રશ્યમ 2’ના નિર્દેશક અભિષેક પાઠક પણ ટૂંક સમયમાં લાંબા સમયની ગર્લફ્રેન્ડ અને ‘ખુદા હાફિઝ’ની અભિનેત્રી શિવાલીકા ઓબેરોય સાથે સાત જન્મના બંધનમાં બંધાઈ જવાના છે. તેઓ આગામી 8 ફેબ્રુઆરીએ ગોવામાં શિવાલિકા સાથે પ્રભુતામાં પગલાં પાડશે. આ ભવ્ય લગ્નમાં પરિવારજનો, નજીકના મિત્રો અને ફિલ્મી સમુદાયના લોકો હાજરી આપે તેવી અપેક્ષા છે.
અભિષેક પાઠક અને શિવાલીકા એકબીજાને લાંબા સમયથી ઓળખે છે. બંનેની પહેલી મુલાકાત ફિલ્મ ‘ખુદા હાફિઝ’ના સેટ પર થઈ હતી. ત્યારથી, બંને વચ્ચે નિકટતા વધી હતી. લાંબા સમય સુધી ડેટિંગ કર્યા પછી, શિવલીકા અને અભિષેકે 24 જુલાઈ, 2022 ના રોજ સગાઇ કરી લીધી હતી. અભિષેકે શિવાલિકાને તુર્કીમાં રોમેન્ટિક રીતે લગ્ન માટે પ્રપોઝ કર્યું હતું.
અભિષેક પાઠક પિતા બોલિવૂડના દિગ્ગજ નિર્માતા કુમાર મંગત પાઠકના પુત્ર છે. બીજી તરફ, શિવાલીકાએ પણ તેની કારકિર્દીની શરૂઆત આસિસ્ટન્ટ ડિરેક્ટર તરીકે કરી હતી. શિવાલિકા પછી અભિનય તરફ વળી, અભિનેત્રી પહેલીવાર 2019માં ‘યે સાલી આશિકી’માં જોવા મળી હતી અને પછી તે ‘ખુદા હાફિઝ’ના બંને ભાગમાં લીડ તરીકે જોવા મળી હતી.
