ઉત્તરાયણને હજુ 25 દિવસની વાર છે ત્યારે અત્યાથી જ પતંગની દોરીને કારણે થતા અકસ્માતોની ઘટનાઓ સામે આવી રહી છે. સુરતમાં પતંગની દોરીથી યુવાનનું ગળું કપાવાની ઘટના સામે આવી છે. શહેરના પાંડેસરા વિસ્તારમાં એક યુવાન બાઇક પર પત્ની સાથે પસાર થઈ રહ્યો હતો, ત્યારે પતંગની દોરી ગળામાં લપેટાઈ જતા ગળું કપાઈ જવાની ઘટના બની હતી. પત્નીએ પતિને બચાવવાનો પ્રયાસ કરતા પત્નીના આંગળીઓમાં દોરી વીંટળાઈ જતા ઈજા પહોંચી હતી.
27 વર્ષીય યુવાન બબલુ હરીચંદ્ર વિશ્વકર્મા પાંડેસરા પિયુષ પોઇન્ટ બ્રિજ પરથી બાઈક પર પત્ની સાથે પસાર થઈ રહ્યો હતો. દરમિયાન તેમના શરીર પાસેથી પતંગની દોરી વીંટળાઈ ગઈ હતી. જેથી ગળું કપાઈ ગયું હતું. લોહી લુહાણ થઈ જતા તાત્કાલિક સારવાર અર્થ નવી સિવિલ હોસ્પિટલમાં દાખલ કરાયો હતો. ડોક્ટરે ઓપરેશન કરી યુવાનનો જીવ બચાવી લીધો હતો. બાઈકની પાછળ બેઠેલ પત્નીએ પતિને બચાવવા જતા દોરીથી તેઓ પણ ઈજાગ્રસ્ત થયા હતા. પત્નીને પતંગના દોરીથી હાથમાં સામાન્ય ઇજાઓ પહોંચી હતી.
શહેરમાં અત્યાર સુધીમાં પતંગથી દોરીથી કપાઈ જવાના ત્રણ કિસ્સાઓ સામે આવ્યા છે. સુરત મહાનગરપાલિકા ઉત્તરાયણના બે મહિના પહેલા પતંગની દોરીથી બચાવવા માટે શહેરના બ્રિજ ઉપર તાર લગાવવાની કામગીરી કરતી હોય છે. પરંતુ આ વખતે ઉત્તરાયણના પર્વને 25 દિવસ બાકી હોવા છતાં પણ હજુ કોઈ કામગીરી કોઈ કરાઈ નથી જેનો ભોગ નાગરીકો બની રહ્યા છે.