NIAના ઈમેલ આઈડી પર શુક્રવારે આતંકવાદી હુમલાને લઈને એક મેઈલ મળતા હડકંપ મચી ગયો હતો. આ મેઈલ બાદ મહારાષ્ટ્રના અલગ-અલગ શહેરોમાં પોલીસને એલર્ટ કરવામાં આવી હતી. હવે આ મામલે વધુ એક મોટો ખુલાસો થયો છે. ઈમેલ આઈડી બનાવવા માટે જે મોબાઈલ નંબરનો ઉપયોગ કરવામાં આવ્યો હતો તે મોબાઇલ નંબર પરથી પહેલા પણ ઘણા મેઈલ આઈડી બનાવવામાં આવ્યા હતા અને રશિયાથી ગોવા આવતી ફ્લાઈટમાં પણ આમાંથી એક મેઈલ આઈડીમાંથી બોમ્બ હોવાનો દાવો કરવામાં આવ્યો હતો.
ઈ-મેઈલ કરનારે પોતાને તાલિબાન ગણાવ્યો હતો અને દાવો કર્યો હતો કે તાલિબાન સંગઠનના અગ્રણી નેતા સિરાજુદ્દીન હક્કાનીના આદેશ પર આવું થવા જઈ રહ્યું છે. આ પછી અન્ય એજન્સીઓની સાથે મુંબઈ પોલીસ પણ તપાસમાં લાગી ગઈ છે. સૂત્રોએ જણાવ્યું કે પ્રાથમિક તપાસમાં એવું પણ જાણવા મળ્યું છે કે આ મેઈલના તાર પાકિસ્તાન સાથે જોડાયેલા છે. આરોપીઓએ Jhonwickincia@gmail.com નામના ઈમેલ આઈડીનો ઉપયોગ કરીને ધમકીભર્યો મેઈલ મોકલ્યો હતો. આ મેઈલ આઈડી બનાવવા માટે જે નંબરનો ઉપયોગ કરવામાં આવ્યો હતો તે પાકિસ્તાનના કરાચીથી ઓપરેટ થતો હતો. આ સાથે સૂત્રોએ એમ પણ જણાવ્યું હતું કે આ મોબાઈલ નંબર પરથી ઘણા ઈમેલ આઈડી બનાવવામાં આવ્યા છે. આમાંથી એકનો ઉપયોગ ગોવાના ડાબોલિમ એરપોર્ટને ધમકી આપવા માટે પણ કરવામાં આવ્યો હતો, જેને કારણે ફ્લાઈટને ઉઝબેકિસ્તાન ડાયવર્ટ કરવામાં આવી હતી.
હવે એવી અટકળો લગાવવામાં આવી રહી છે કે આતંકવાદી સંગઠનો નવી મોડસ ઓપરેન્ડી હેઠળ આ બધું કરીને એજન્સીઓને હેરાન કરવાનો પ્રયાસ કરી રહ્યા છે. હાલમાં NIA ઘણા મોટા મામલાની તપાસમાં લાગેલી છે, જેનો સીધો સંબંધ પાકિસ્તાન સાથે છે. એનઆઈએ દ્વારા આ તમામ કેસોની તપાસને કારણે આતંકવાદી સંગઠનોના કામકાજ પર અસર પડી રહી છે અને તેમના ઘણા ઓપરેશન નિષ્ફળ થઈ રહ્યા છે. જોકે, એક અધિકારીએ કહ્યું કે આવા એક પણ મેઇલને અવગણવું શક્ય નથી. આ કારણોસર, આતંકવાદીઓ એજન્સીઓને હેરાન કરવા માટે આવા મેઇલ મોકલે છે.
મુંબઈ પોલીસને ધમકીભર્યા કોલ્સ કે ઈમેઈલ આવવાનું સામાન્ય થઈ ગયું છે. આ પહેલા પણ આવા ઘણા ટ્વીટ સામે આવ્યા છે, જેના કારણે રાતોરાત ગભરાટ મચી ગયો છે. 3 ફેબ્રુઆરીએ જ એક વ્યક્તિએ ટ્વિટર હેન્ડલ @indianslumdogનો ઉપયોગ કરીને ટ્વિટ કર્યું હતું. ટ્વિટર હેન્ડલ @indianslumdogને હાલમાં સસ્પેન્ડ કરવામાં આવ્યું છે અને મામલાની તપાસ કરવામાં આવી રહી છે.
