કોલાબા-સીપ્ઝ મેટ્રોનો ટ્રાયલ રન ટૂંક સમયમાં
મુંબઈમાં ફ્લાયઓવર અને મેટ્રો સેવાઓનું નેટવર્ક ઝડપથી વિસ્તરી રહ્યું છે. સીપ્ઝ-કોલાબા વચ્ચેની મેટ્રો સેવા ડિસેમ્બર 2023 સુધીમાં જનતા માટે ઉપલબ્ધ કરવામાં આવશે એવી જાણકારી મુંબઈ મેટ્રો રેલ કોર્પોરેશન લિમિટેડ (MMRC)એ આપી હતી અને જણાવ્યું હતું કે, આ રૂટ પરના 26 માંથી 21 સ્ટેશનો 90 ટકા પૂર્ણ છે. તો, 18 સ્ટેશનો પર અન્ય સાધનો લગાવવાનું કામ 50 ટકા પૂર્ણ થઈ ગયું છે. વિધાન ભવન સ્ટેશન 93 ટકા પૂર્ણ છે જ્યારે MIDC સ્ટેશન 96 ટકા પૂર્ણ છે. માર્ચ 2021થી ટ્રેક નાખવાનું કામ ચાલુ છે. અત્યાર સુધીમાં આ કામ 56 ટકા સુધી પૂર્ણ થયું છે. તે 33.5 કિમીનો રૂટ છે. MMRCએ આરેમાં કારશેડ વહેલામાં વહેલી તકે પૂર્ણ કરવાનો લક્ષ્યાંક નક્કી કર્યો છે. અત્યાર સુધીમાં કારશેડનું 53.8 ટકા કામ પૂર્ણ થઈ ગયું છે. જોકે, આ વર્ષે આરે કારશેડનું કામ પૂર્ણ થઇ શકશે નહીં તેથી MMRCL એ સીપ્ઝથી BKC સુધી 9 રેક સાથે મેટ્રો સેવા શરૂ કરવાનો નિર્ણય લીધો છે.
મેટ્રો-3નો પ્રથમ તબક્કો ડિસેમ્બર, 2023માં ચાલુ કરવામાં આવે તે પહેલા રિઅલ સ્પીડ પર પરીક્ષણ કરવામાં આવશે. સીપ્ઝથી બીકેસી નોર્થ સુધી લગભગ 10,000 કિલોમીટરના આવા પરીક્ષણો હાથ ધરવામાં આવશે. હાલમાં મેટ્રો 3નું કામ ચાલી રહ્યું છે અને આ રૂટ પર 79.8 ટકા કામ પૂર્ણ થઈ ગયું છે.
કોલાબાથી સીપ્ઝ સુધીમાં જે સ્ટેશનો છે તેમાં કફ પરેડ , વિધાન ભવન, ચર્ચગેટ, હુતાત્મા ચોક, CSMT, કાલબાદેવી, ગિરગાંવ, ગ્રાન્ટ રોડ, મુંબઈ સેન્ટ્રલ, મહાલક્ષ્મી, સાયન્સ મ્યુઝિયમ, આચાર્ય અત્રે ચોક, વર્લી, સિદ્ધિવિનાયક, દાદર, શીતલા દેવી, ધારાવી, BKC, વિદ્યાનગરી, સાંતાક્રુઝ, CSMIA (T1), સહાર રોડ, CSMI (T2), મરોલ નાકા, MIDC અને સીપ્ઝનો સમાવેશ થાય છે.
