મુંબઈ: આજે વિશ્ર્વ બજારમાં બ્રેન્ટ ક્રૂડતેલના વાયદામાં ભાવ ઘટી આવ્યાના અહેવાલ તેમ જ ડૉલર ઈન્ડેક્સમાં વધ્યા મથાળેથી પીછેહઠ જોવા મળતાં સ્થાનિક ફોરેક્સ માર્કેટમાં ડૉલર સામે રૂપિયો ૧૦ પૈસાના સુધારા સાથે ૮૨.૧૫ના મથાળે બંધ રહ્યો હતો. જોકે, ગઈકાલે સ્થાનિક ઈક્વિટી માર્કેટમાં વિદેશી સંસ્થાકીય રોકાણકારોની ઈક્વિટીમાં ચોખ્ખી વેચવાલી રહી હોવાથી સુધારો મર્યાદિત રહ્યો હતો.
બજારનાં સાધનોના જણાવ્યાનુસાર આજે સ્થાનિકમાં ડૉલર સામે રૂપિયો ગઈકાલના ૮૨.૨૫ના બંધ સામે સાધારણ સુધારા સાથે ૮૨.૨૧ની સપાટીએ ખૂલ્યા બાદ સત્ર દરમિયાન નીચામાં ૮૨.૨૧ અને ઉપરમાં ૮૨.૧૨ સુધી મજબૂત થયા બાદ અંતે ગઈકાલના બંધથી ૧૦ પૈસાના સુધારા સાથે ૮૨.૧૫ના મથાળે રહ્યા હતા.
પ્રાપ્ત અહેવાલ અનુસાર આજે વિશ્ર્વ બજારમાં ડૉલર ઈન્ડેક્સ ગઈકાલના બંધથી ૦.૦૮ ટકા ઘટીને ૧૦૧.૮૮ અને બ્રેન્ટ ક્રૂડતેલના વાયદામાં ભાવ ૧.૬૫ ટકા ઘટીને બેરલદીઠ ૮૧.૭૫ ડૉલર આસપાસ ક્વૉટ થઈ રહ્યાના અહેવાલ ઉપરાંત આજે સ્થાનિક ઈક્વિટી માર્કેટમાં બીએસઈ બૅન્ચમાર્ક સેન્સેક્સ તથા એનએસઈ બૅન્ચમાર્ક નિફ્ટીમાં અનુક્રમે ૬૪.૫૫ પૉઈન્ટનો અને ૫.૭૦ પૉઈન્ટનો સાધારણ સુધારો આવ્યો હોવાથી રૂપિયાના સુધારાને ટેકો મળ્યો હતો.